ځېنو مدني بنسټونو، ځوانانو او دیني عالمانو نن کابل کې یوه غونډه کې د افغانستان دولت او طالبانو ترمنځ له اعلان شوي اوربند هرکلی وکړ.
دوی هیله څرګنده کړه چې دغه لنډمهالی اوربند په تلپاتې اوربند بدل شي.
مدني فعال عمر یعقوبي، د افغان دولت او طالبانو ترمنځ موقت اوربند په نیک فال نیسي او هیلهمن دی چې هېواد کې دایمي اوربند ته زمینه برابره کړي.
دیني عالم میرحسینشاه ناصري هم د افغان دولت او د طالبانو لهدې اقدامه ستاینه کوي او وايي، امکان شته چې څو ورځنی اوربند داسې هېواد کې چې کلونه کېږي د جګړې په اور کې سوځي؛ تلپاتې سولې ته لاره هواره کړي.
د سولې عالي شورا استازی امینالدین مظفري هم دې غونډې ته وویل، لنډمهالي اوربند ته د قدر په سترګه ګوري او هیلهمن دی چې هېواد کې تلپاتې سولې ته زمینه برابره شي.
د لومړي ځل لهپاره افغان حکومت د روان کال د جوزا میاشتې په اولسمه نېته، طالبانو سره جګړه کې د روژې له ۲۷مې د اختر تر پنځمې پورې یو اړخیز اوربند اعلان کړ.
له طالبانو سره د اوربند په اړه د ولسمشر غني له ویډیويي پیغام خپرېدو دوې ورځې وروسته طالبانو هم یوه اعلامیه کې وویل چې یوازې د اختر په درېیوو ورځو کې به په افغان امنیتي ځواکونو بریدونه نه کوي؛ خو د بهرنیو ځواکونو پر وړاندې به یې بریدونه همداسې روان وي.
