د افغانستان بهرنیو چارو وزارت وايي چې د راتلونکې جمعې په ورځ یو دولتي پلاوی به اسلاماباد ته سفر وکړي او دغه پلاوی به د هغه هېواد له چارواکیو سره په کابل کې د وروستۍ هغې غونډې په اړه چې د پاکستاني پلاوي سره شوې وه؛ هغه پرېکړې او ژمنې تعقیب او خبرې اترې پرې وکړي.
د بهرنیو چارو وزارت مرستیال ویاند صبغت احمدي سلاموطندار ته وویل، د افغان دولت دغه پلاوی د ترهګرۍ پرضد مبارزې، د سولې په برخه کې په همکارۍ، اقتصادي همکارۍ او په پاکستان کې د مېشتو افغان کډوالو په اړه خبرې اترې وکړي.
ښاغلي صبغت د پلاوی ترکیب په اړه ډېر جزیات ورنه کړل او یوازې وویل، چې د بهرنیو چارو وزارت او د یوشمېرو نورو ادارو غړي په دې پلاوي کې شامل دي.
دا داسې مهال ده، چې کابل ته د پاکستاني پلاوي له راتګ وروسته د هغه هېواد د پوځیانو لهخوا د کونړ ولایت په ۵ ولسوالیو توغندیزو بریدونو زور اخیستی دی.
