په پام کې ده، چې د امریکا متحده ایالات د افغانستان هلمند ولایت ته په راتلونکي پسرلي کې ۳۰۰ سمندري مسلح ځواکونه وليږي.
سپينې ماڼۍ د خپلو پریکړو خلاف دغه پلان نیولی، ځکه دوی غوښتل، چې په تدریجي ډول په افغانستان کې به خپل پوځيان کم کړي.
امریکايي ځواکونه په ۲۰۱۴ میلادي کال کې د ناټو له پریکړې وروسته له هلمند ولایت څخه ووتل.
سمندري ځواکونه لومړني پوځيان و، چې پر امریکا د ۱۱م سپټامبر برید څخه وروسته افغانستان ته داخل او څو زره تنه يې په هلمند کې د طالبانو پر ضد د جګړې په موخه میشت شول.
دغه سمندري پوځيان د ۲۱۵ لوا پوځيانو ته روزنه ورکوي او د امریکا له مرکزي قوماندانۍ سره به په اړیکه کې وي.
