سپینې ماڼۍ یوځل بیا پر هندوستان او پاکستان ټينګار کړی، چې باید خپلمنځي اختلافات د خبرو اترو له لارې حل کړي.
د امريکا د بهرنيو چارو وزارت د ویاند مرستیال مارک سي ټونر په واشنګټن کې د يوې خبري ناستې پر مهال ویلي، چې د دغو دوو ګاونډي هېوادونو د اختلافاتو د حل له پاره امريکا هر ډول کار ستايي.
د امريکا د بهرنيو چارو وزارت د ویاند مرستیال زیاته کړې، چې د هندوستان او پاکستان ترمنځ د اختلافاتو حلول د ټولې نړۍ په ګټه ده او د نړۍ هېوادونه هم په دغه برخه کې د مرستو له پاره چمتو دي.
هغه په پاکستان کې د حقاني شبکې د موجودیت په اړه يې وویل، چې امريکا په پاکستان کې د ترهګریزو شبکو په ځانګړي ډول د حقاني تروریستي ډلې څخه زیات د خطر احساس کوي.
د یاد هېواد د بهرنيو چارو وزارت د ویاند مرستیال خبریالانو ته دا هم وویل، چې امريکا په جدي توګه څاري، چې پاکستان د حقاني شبکې پر وړاندې کوم اقدامات ترسره کوي.
تېره ورځ د اوباما د ملي امنیت سلاکاره سوزن رایس د پاکستان د ملي امنیت سلاکار سرتاج عزیز سره په خبرو کې خبرداری ورکړ، چې په امريکا ته دا هيڅکله د منلو وړ نه دي، چې په افغانستان کې شوي ترهګریز بريدونه دې په پاکستان کې پلان شي.
هغې ویلي و، چې په د کابل په شاه شهيد سيمه کې تروریستي بريد د حقاني شبکې له لوري شوی وو او د حقاني شبکه د پاکستان په خاوره کې پټنځايونه لري.
