د داعش ډلې ۲۲ زره ګومارل شویو کسانو اسناد افشا شوي

یو اسټرالیايي ټلویزیون ادعا کړې، چې دوی ته د داعش وسله والې ډلې د ۲۲ زره ګومارل شویو وسله والو کسانو د نوملړ اسناد پېدا کړي او په کې د يادې ډلې د ځينو کسانو په هکله پوره اطلاعات هم درج شوي دي.

دغې رسنۍ زیاته کړې، چې په افشا شویو فورمونو کې د هغو کسانو نومونه هم شته، چې په راتلونکي کې غواړې له دغې ډلې سره فعالیت وکړي.

د سکای نیوز نومي رسنۍ خبر ورکړی، چې په یادو اسنادو کې د اروپايي او بريټانيا هېوادونو په ګډون له ۵۰ زیاتو هېوادونو وګړي شامل دي.

همدارنګه دغه ټلویزیون په خپل راپور کې لیکلي، چې په نوملړ کې د هر کس نوم، د وینې ګروپ، د اړیکې شمېره، د خپلوانو او ملګرو پتې او نور محرم اطلاعات شامل دي.

سکای نیوز تلویزیون وايي، چې په دې نوملړ کې زیات شمېر یې مشهور کسان دي، د بېلګې په توګه ۲۶ کلن عبدالباري چې د یو وخت په برېټانیا کې د رپ مشهور سندرغاړی و او اوسمهال له ۲۰۱۳ م ز کال راهیسې تر اوسه پورې داعش وسله والې ډلې له پاره فعالیت کوي.

په دې لیست کې نور مشهور کسان لکه ریاض خان او حسن جنید، چې د داعش وسله والې ډلې له پاره تبلیغات کوي نومونه یې هم راغلي  دي؛ خو دغه کسان په سوریه کې په وروستیو هوايي بریدونو کې وژل شوي دي.

د دغه تلویزون د راپور له مخې یاد سندونه ښيي، چې داعش په لیکو کې نوي ګومارل شوي کسان د "جهادي" تمرینونو له پاره بېلا بېلو هېوادونو لکه عراق، سوریه، سوډان او افغانستان ته لېږل کېږي.

د دغو سندونو په ځېنو برخو کې د "فداییانو" په نوم پاڼه بېله شوې ده، چې په دې نوملړ کې کسان د ځانمرګو بریدونو له پاره روزل کېږي او په دې برخه کې ترې کار اخیستل کېږي.

سکای نیوز لیکلي دي، چې دغه سندونه د یو سوري نفوذي کس له خوا چې مستعار نوم یې اوبوحامد دی د داعش له وسله والې ډلې یې غلا کړي او دوی ته یې رسولي دي.

په ورته وخت کې د امریکا متحده ایالاتو یوې فدرالي محکمې د تاېرود پوغ په نوم د متحده ایالاتو یو سرتېری په دې تور ګناهکار پېژندلی دی، چې له ترهګریزو ډلو یې ملاتړ کړی دی.

تایرود پوغ د هو ۸۰ امریکايي سرتېرو له ډلې دی، چې د داعش وسله والې ډلې ملاتړ کوي او د "اف، بي، اې" او امریکايي محاکمو تر څار لاندې دي.