د غزني امنیه قوماندان جنرال امین الله امرخېل وايي، چې وسله والو طالبانو برمته کړي، کسان د یو پاکستاني ملا په فتوا سره وژلي دي.
د جنرال امرخېل په وینا، د دوی فتوا له کوېټې ښارنه ورکړل شوې وه، چې دغه کار د ټولو دیني او جنګي قوانینو خلاف عمل دی.
دغه کسان د غزني ولایت په اندړو ولسوالې کې تېره ورځ ماښام ناوخته وسله والو طالبانو وژلي دي.
د غزني ولایت د سیمه ییزو چارواکو په خبره، دغه خلک څه وخت مخکې وسله والو طالبانو یرغمل کړي وو او پرون ماښام یې د اندړو ولسوالۍ په کمال خېلو کلي کې په ډزو وژلي دي.
د دې ولایت امنیه قوماندان وايي، چې وسله والو طالبانو دغه کسان د وردګو ـ غزني، زابل ـ غزني، او پکتیکا ـ غزني په لویه لارو کې نیولي وو، چې په دغو کسانو کې د ملي امنیت، پولیسو او د ملي اردو سرتېري شامل وو.
دی زیاتوي، "قرباني" شوي کسانو په پکتیکا ولایت کې دندې لرلې.
ټاکل شوې ده، چې د وژل شویو کسانو جسدونه به له سیمې نه د غزني مرکز او ځېنې نور به کابل ته ولېږدول شي.
د غزني والي محمد امان حمیمي وايي، وسله والو طالبانو دغه کسان د دوو میاشتو په اوږدو کې نیولي وو.
د غزني ولایت د سره صلیب ادارې ویلي دي، چې دغه وژل شوي کسان یې روغتون ته راوړي دي.
د سره صلیب مامورین وايي، چې د وژل شویو کسانو لاسونه په زنځیرونو تړل شوي وو او وجودونه یې په ګولیو سوري ، سوري شوي دي.
دی وايي، چې دغزني ولایت امنیتي ځواکونو د دوی د خلاصون له پاره هڅې کړې وې، خو په خلاصون یې بریالي شوي نه وو.
وسله والو طالبانو په دې اړه څه نه دي ویلي.
