د تالقانو ښار ته نږدې یوې هدیرې کې لسګونو کورنیو پهدې پار خېمې وهلې دي.دوی هغه بېځایه شوې کورنۍ دي چې تېرو څوو ورځو کې د ناامنیو زیاتېدو په دلیل له دښتکلا ولسوالۍ څخه د تخار مرکز تالقانو ښار ته کډه شويدي.
د کډوالو له خېمې وهلو درې ورځې تېرېږي او د ورځې په تېرېدو سره د کډوالو شمېر هم زیاتېږي. دلته ۲۰۰ کورنۍ کډوالې شوېدي.
پريګل د ۷ ماشومانو مور ده چې خپل مېړه یې څو ورځې وړانډې طالبانو سره جګړه کې له لاسه ورکړیدی.
هغه وايي، دښتکلا ولسوالۍ کې د طالبانو راکټي بریدونو له امله اړ شوېده چې خپل کور خوشې کړي.
نوموړې چې د شپې لهپاره ګرم ځای او د ماشومانو د خوندي ساتلو لهپاره پوښاکي وسایل نهلري؛ له حکومتي بنسټونو غواړي، د دوی وضعیت ته پام وکړي.
تېرو دوو ورځو کې د تالقانو ښار د منډوي مشر ګلاب عطايي د یوه بل کس په همکارۍ د بېځایه شویو لهپاره ډوډۍ چمتو کړې. هغه وايي، د مرستندویو بنسټونو نه پام په دلیل یې پرېکړه کړې چې دوی سره همکاري وکړي.
د ښاغلي عطايي په وینا، تېرو درېیوو ورځو کې حکومتي مسوولان د بېځایه شویو سروې لهپاره نهده ورغلي.
د تخار والي ویاند جواد هجري وايي، ځايي ادارې د هغو بېځایه شویو وضعیت څېړلو لهپاره یو پلاوی ګومارلی چې د پرلت خېمه یې وهلې.
د تخار د کډوالو ریاست مسوولان وايي، د سږ کال له پیله تراوسه پورې د دې ولایت ناامنو ولسوالیو او د کندوز دښتارچي ولسوالۍ څخه ۷زره کورنۍ بېځایه شوي او د تالقانو ښار بېلابېلو برخو کې ځای پرځای شوېدي.
د تخار د کډوالو ریاست د مسوولانو په وینا، تراوسه څه باندې ۲ زره کورنیو د دې ریاست له لوري د خوراکي توکیو او نغدي مرسته ترلاسه کړېده.
