د ولسي جرګې نننۍ عمومي غونډې ته د ماليې وزیر محمد اکلیل حکیمي او د افغانستان بانک ځای ناستی لوی رییس خان افضل هډه وال وربلل شوی وو، چې د کورنیو عوایدو د کموالي، د بهرنیو اسعارو د لوړوالي، د کابل د یو شمېرهټېوالو د شکایتونو او دا، چې ولې وزیر د دې جرګې د اقتصاد د کمېسیون غونډې ته نه وو حاضرشوی ځواب ووایي.
دماليې وزير اکلیل حکيمي وویل، چې د دوی له لورې چمتو شوی د ۵ میاشتو پلان پر اساس له اټکله هم ۵ سلنه عواید لوړ شوي دي، چې دا د تېر کال د لومړيو ۵ میاشتو په پرتله ۷ سلنه لوړوالی ښيي
حکيمي د عواېدو د لوړوالي د لاملونو په هکله زياته کړه، دوی د لویو مالیه ورکونکو پخواني د قسط سیسټم له منځه یوړل، د منځنیو مالیه ورکونکو یې هم څارنه ډیره کړه، په وينا يې د ګمرکاتو په اړه یې څه بدلونونه راوستي او دمالیې د ورکړې سیسټم يې هم برښانایي کړي.
همدارنګه نوموړي زياته کړه، هغه ګنګوسې چې ګواکې د مالیې وزارت په هټېوالو مالیه زیاته کړې رد کړې او و يې ویل، چې پخوا کوم دوکانداران، چې مالیه نه ورکوله اوس مالیه ترې اخیستل کيږي.
ده د خپلو څېړنو یوه بيلګه یاده کړه، چې پخوا د کابل ښار په ۷ مه ناحيه کې ټولټال له ۷۰۰ هټېو مالیه اخیستل کېده، خو په دې وروستيو کې دوی ته دا جوته شوه، چې باید له ۳ زرو هټېو څخه مالیه واخیستل شي.
دغه راز د مالیې وزیر د ولسي جرګې د ملي اقتصاد د کمېسیون غونډې ته د نه ورتګ دلیل په خپلو دندو کې بوختيا وبلله او زياته يې کړه، چې هغه مهال دی د کابينې په نورو غونډو کې مصروف وو او پر خپل ځای یې مرستيال ليږلی وو.
د افغانۍ پر وړاندې د نورو اسعارو د لوړیدو په اړه یې وویل، د ګاونډویو هېوادونو لکه پاکستان، ایران او روسیې د پېسو په پرتله اوس هم افغانی لوړه ده او ډالر، چې په نړېواله کچه لوړ شوی د تېرکال په پرتله د افغانۍ پر وړاندې ۴ سلنه لوړشوی دی، چې په وينا يې دا د اندېښنې وړ خبره نه ده.
خو د مالیې د وزیرځوابونه یوشمیر وکیلانو ته د قناعت وړ نه وو. د ملي اقتصاد د کمېسیون غړی محمد هاشم وویل، تاسو پخوا ژمنه کړې وه، چې په ۵ میاشتو کې به د مالیې د وزارت اړوند ستونزی هوارې کړي او ليدل کيږي، چې اوس په دغه وزارت کې ستونزې پر خپل ځای پاتې دي.
د غونډې په پای کې پریکړه وشوه، چې د مالیې وزیر هرات د تګ له کبله نه شول کولی، چې د وکيلانو پوښتنو ته قانع کوونکي ځوابونه ووايي، نو د افغانستان بانک ځای ناستي رییس په ګډون دې د راتلونکې شنبې ورځې غونډې ته یوځل بیا را وغوښتل شي او د وکیلانو پوښتنو ته دې ځواب ورکړي.
