د کرنې، مالداري او اوبولګولو وزارت چارواکي وایي، په وروستیو کلونو کې په بېلابېلو ولایتونو کې د کبانو د روزنې د درېیوو دولتي فارمونو ترڅنګ له ۲ زرو ډېر د کبانو خصوصي فارمونه جوړ شويدي.
د کرنې وزارت د مالداري ریاست د کبانو روزنې د څانګی مدیر خلیلالله فروغ سلام وطندار ته وویل چې د کبانو روزنې ډېر فارمونه په کابل، بلخ، هلمند، روزګان، کندهار فراه، ننګرهار، لغمان او کونړ ولایتونو کې جوړ شوي چې شمېر یې ۲ او ۲۴۹ ته رسېږي.
د ښاغلي فروغ په وینا، لهدې دومره فارمونو سره ـ سره لا هم افغانستان د کبانو غوښې د تولید په برخه کې ځانبساینې ته نهدي رسېدلي. د ده په خبره، افغانستان اوس هر کال د کبانو ۱۲۰ میلیون ټنې غوښې ته اړتیا لري چې ممکن په راتلونکي کې دې خودکفايۍ ته ورسېږو.
د کرنې وزارت دغه مسوول زیاته کړه چې د افغانستان د اړتیا وړ د کبانو غوښه د ژمي په موسم کې له ایران او پاکستانه واردېږي.
په افغانستان کې دوه ډوله کبان روزل کېږي چې یو یې د ګرمو اوبو کبان او بل یې د سړو اوبو کبان ګڼل کېږي چې د ګرمو اوبو هغو ته خوراکي توکي په کور دننه چمتوکېږي او د سړو اوبو کبانو خوراکي توکي له ایرانه واردېږي.
په فاریاب کې د کبانو یو فارملرونکي غلامنبي یوسفي وایي، پنځه کاله مخکې یې د کبروزنې ته مخه کړې او هر کال د کبانو ۴۵ ټنه غوښه تولیدوي.
ښاغلي یوسفي زیاته کړه، هڅه کوي تر راتلونکیو دوو کلونو دا اندازه په کال کې ۱۲۰ ټنو ته لوړه کړي. د ده په خبره په دوو کلونو کې یې پانګه ۱۶۵ زره ډالره زیاته شوېده.
د کرنې او مالداري وزارت د مالداري ریاست د کبانو روزنې څانګې مدیر وایي چي اوسمهال د کبانو د تکثیر فارمونه په کابل، د هرات په چشت ولسوالۍ او د کاپیسا په کوهستان کې فعالیت لري.
د کرنې وزارت د شمېرو لهمخې، هر کال د کابل او کاپیسا په فارمونو کې د کبانو ۸۰۰ زره بچیان تولیدېږي او بیا فارملرونکیو ته ورکول کېږي. لهدې سره هممهاله د تکثري فارم په فعالېدو سره د هرات د چشت ولسوالۍ فارم به په راتلونکي کال کې ۴۰۰ زره قطعې واړه کبان تولید او فارملرونکیو اشخاصو ته به تسلیم کړای شي.
په ټوله کې د کرنې وزارت مالداري ریاست د کبانو روزنې څانګې چارواکي په غیرمعیاري توګه د کبانو ښکار د اندېښنې وړ بولي او وایي، سره لهدې چې په غیرمعیاري ډول د کبانو ښکار بند دی؛ خو د دې چارې زیاتوالي د کبانو، په ځانګړي توګه د بومي کبانو نسل له ګواښ سره مخ کړیدی.
