د ولسي جرګې مالي او بودیجې کمېسیون نن د جرګې عمومي غونډه کې د وزارتونو او خپلواکو دولتي ادارو د پراختیايي بودیجې مصرف څېړلو راپور وړاندې کړ.
د دغو راپورونو پر بنسټ د شپږو وزارتونو او خپلواکو ادارو پراختیايي بودیجې لګښت په نشت دی.
په راپور کې راغلي چې د ملي دفاع او ښځو چارو وزارت، ملي شورا، د کوچنیو تمویلي سرچینو ملاتړ لهپاره د سهولت رامنځته کولو او ملي ستندرد ادارو پراختیايي بودیجې لګښت صفر دی.
د ولسي جرګې د مالي او بودیجې کمېسیون رییس عظیم محسني چې د کمېسیون راپور اورولو پرمهال وویل چې ټولو حکومتي سکتورونو د روان لمریز کال د جوزا تر ۵ نېټې پورې ۱۸ سلنه پراختیايي بودیجه لګولې ده.
د ښاغلي محسني په وینا، د دوی څېړنې ښيي چې د پراختیايي بودیجې په لګولو کې د حکومتي ادارو کارونه د قناعت وړ نهدي.
د ولسي جرګې دویم نایب امیرخان یار چې د جرګې مشري یې کوله؛ وویل، هغو ادارو چې د پراختیايي بودیجې په لګولو کې ناغیړي کړې؛ باید کمېسیون ته ور وبلل شي.
د ولسي جرګې مالي او بودیجوي کمېسیون د راپور پر بنسټ، زیاتره دولتي ادارو د پراختیايي بودیجې لګولو په برخه بېخي کمزوری عمل کړی او د بودیجې مصرف يې له ۵ تر ۱۰ سلنه دی.
د ولسي جرګې مالي او بودیجې کمېسیون څه موده مخکې هم د دولتي ادارو پراختیايي بودیجې مصرف په اړه راپور وړاندې کړی و چې په هغه کې هم د بودیجې نه لګولو په اړه اندېښنه ښودل شوېوه.
