د افغانستان نولس کلنې کرکټ ملي لوبډلې د اسیا غوره لیګ پنځوس اوریزه کرکټ سیالیو په دوام وروستۍ لوبه کې هم بریا ترلاسه کړه.
د افغانستان کرکټ بورډ له خوا سلام وطندار ته په رالېږل شوې خبرپاڼه کې راغلي، چې افغان نولس کلنې کرکټ ملي لوبډلې په وروستۍ پنځمه لوبه کې مالیزیا ته په ۷ ویکټو ماته ورکړه.
خبرپاڼه لیکي، چې لومړی افغانستان کوربه لوبډله د نوین الحق د ۶ ویکټو په غورسځولو سره په پنځوسم اور کې په ۱۰۵ منډو وسوځوله او بیا یې هدف د حضرت الله ځاځي د ۶۰ منډو په کولو سره په ۲۲م اور کې د ۳ لوبغاړو په سوځېدلو ترلاسه کړ.
د مالیزیا پر خلاف د وروستۍ لوبې په پاې کې نوین الحق په ښکلې توپ اچونې د لوبې او حضرت الله ځاځې په ټولټال ۳۱۴ منډو د ټورنمېنټ غوره لوبغاړی اعلان شو.
کرکټ بورډ زیاتوي، چې افغان ۱۹ کلنې کرکت ملي لوبډلې په دغو سیالیو کې کویټ ته په ۸ لوبغاړو، نیپال ته په ۱۰ لوبغاړو، عربي اماراتو ته په ۱۰ لوبغاړو او سعودي عرب لوبډلې ته په ۸ لوبغاړو ماتې ورکړې دي.
د کرکټ بورډخبرپاڼه د خپلو لوړپوړو چارواکو له خولې لیکي، چې افغان کرکټ د پرمختګ په لور روان دې او د کرکټ راتلونکې روښانه ده.
له پرله پسې ۵ بریاوو وروسته افغان نولس کلنې کرکټ ملي لوبډلې د ۶ لوبډلو په کتار کې لومړی مقام ترلاسه کړاو د اتلولۍ جام یی وګټلو.
په دې سیالیو کې د افغانستان له پاره حضرت الله ځاځي، نوین الحق، طارق ستانکزي، ناصرخان او ضیاءالرحمان اکبر د نورو افغانو او نړیوالو لوبغاړو په پرتله ښه وځلېدل او د لوبېدلو ډېر چانسونه یی لرل.
د اسیا نولس کلنو غوره لیګ پنځوس اوریزه کرکټ سیالۍ د ۷ ورځو لپاره د افغانستان، نیپال، سعودي عرب، کویټ او کوربه مالیزیا نولس کلنو کرکټ ملي لوبډلو ترمنځ د مالیزیا په پلازمینه (کولالمپور) ښار کې ترسره شوې.
ټاکل شوې ده، چې د اسیا نولس کلنو اسیا غوره لیګ سیالیو اتله افغان لوبډله د راتلونکې شنبې پر ورځ سهار ۷ بجې کابل کې د حامد کرزي نړیوال هوایي ډګر ته راورسېږي.
