د هرات ولایت د پولیسو ویاند عبدالروف احمدي سلام وطندار ته د تیلفون پر کرښه وویل، چې نن سهار شاوخوا ۶ بجې وسله والو طالبانو په ډله ییزه توګه له سویلې غاړې د شینډنډ ولسوالۍ د مالدار، چوک ذغالي او ارګ په پوستو بریدونه وکړل.
د احمدي پر وینا، تر دې مهاله په دې برید کې ۲ تنه طالب وسله وال وژل شوي دي.
دی زیاتوي چې په دې برید کې ملي پولیسو ته کومه ژوبله نه ده اوښتې او امنیتي ځواکونو طالبان په شاه تمبولي او دامهال نښته د یادې ولسوالۍ په اطرافي سیمو کې روانه ده.
تر دې مهاله وسله والو طالبانو افغان امنیتي ځواکونو ته د اړول شوي مرګ ژوبلې په اړه څه نه دي ویلی.
د شینډنډ ولسوالۍ د هرات ولایت له ناامنو ولسوالیو نه ده، چې په تېرو کلونو کې طالبانو څو ځلې په دې ولسوالۍ بریدونه کړي دي.
