په تخار، زابل، هلمند، بدخشان، فاریاب، بغلان، دایکندي، جوزجان، غور او فراه امنیتي مسوولان وايي، د تېرو درې ورځو پر مهال په دغو ولایتونو کې د نښتو او د طالبانو د بریدونو له کبله ۶۰ امنیتي ځواکونه وژل شوي او ۴۸ نور ټپیان دي.
تخار، زابل، هلمند، فاریاب، جوزجان او فراه بیا هغه ولایتونه دي چې د امنیتي ځواکونو او طالبانو ترمنځ پهکې سختې نښتې شوي او له کبله یې درنه مرګژوبله اوښتې ده.
سلاموطندار ته د رسېدلو معلوماتو له مخې، په تخار، زابل، هلمند او بدخشان ولایتونو کې د نورو هغو په پرتله امنیتي ځواکونو ته ډېره مرګژوبله اوښتې ده.
تخار د ۱۳ سرتېرو په وژل کېدو او ۶ ټپیانېدو، هلمند د ۱۰ په وژل کېدو او ۱۲ ټپیانېدو، بدخشان د ۹ په وژل کېدو او ۷ ټپیانېدو او زابل د ۹ سرتېرو په وژل کېدو سره هغه ولایتونه دي چې امنیتي ځواکونو پهکې ډېره مرګژوبله لیدلې ده.
د زابل د والي ویاند ګلاسلام سیال وايي، د دغه ولایت په ارغنداب ولسوالي کې د امنیتي ځواکونو او طالبانو ترمنځ په نښته کې ۹ سرتېري وژل شوي دي.
د غور، هرات، فاریاب، بادغیس، جوزجان، دایکندي او هلمند ولایتونو امنیتي مسوولان وايي، په نښتو کې وسلهوالو طالبانو ته هم سخته مرګژوبله اوښتې. د دوی په وینا، د امنیتي ځواکونو په ځوابي بریدونو کې ۴۹ طالبان وژل شوي او ۴۳ نور ټپیان دي. دوی وايي، په وژل شویو کسانو کې د طالبانو مهم قوماندانان هم شامل دي.
د جوزجان امنیه قوماندان عبدالواحد وجدان وایي، بېګاه د دغه ولایت پر یوشمېر ولسوالیو د طالبانو څو بریدونه یې پر شا تمبولي دي.
د هغه په وینا، تازه د دغه ولایت په قرقین ولسوالي کې ۵ طالبان وژل شوي دي.
موږ وغوښتل چې په دې اړه د ملي دفاع او کورنیو چارو وزارتونو نظر هم ولرو، خو له پرلهپسې هڅو سره سره ونه توانېدو.
