ټاکل شوې ده، چې د افغانستان فوټبال ملي لوبډله په یوه دوستانه فوټبال لوبه کې د سپټمبر میاشتې په ۳ مه نېټه له تایلینډۍ فوټبال ملي لوبډلې سره د لوبې ډګر ته ووځي.
د افغانستان فوټبال فدراسیون سکرترجنرال سیدعلي اقازاده سلام وطندار راډیو سره په خبرو کې وویل، چې ملي لوبډله به سبا له کابل څخه د تایلینډ پلازمینې (بنکاک) ته روانه شي.
د ورکړل شویو معلوماتو له مخې، چې د افغانستان او تایلینډ فوټبال ملي لوبډلو ترمنځ به دغه دوستانه لوبه د راتلونکې پنجشنبې په ورځ د افغانستان په وخت مازدیګر ۴ نیمې بجې پېل شي.
د اقازاده په وینا، چې په افغان ۲۳ کسیزه لوبډله کې د پخوانيو تجربه لرونکو لوبغاړو ترڅنګ ځوانو لوبغاړو ته هم د لوبېدو موقع ورکړل شوې، چې ۶ لوبغاړي له هیواد څخه او پاتې ۱۷ لوبغاړي له بهرنیو هیوادونو څخه غوره شوي دي.
هغه وايي، دغه لوبه یې د سپټمبرمیاشتې په ۸ مه نیټه له جاپانۍ فوټبال ملي لوبډلې سره د کیدونکې مهمې نړېوالې سیالۍ له پاره د ښه چمتووالي په موخه برابره کړې ده.
دا به لومړی ځل وي، چې د افغانستان فوټبال ملي لوبډله په خپل فوټبال تاریخ کې د تایلینډ پر وړاندې لوبه ترسره کوي.
ټاکل شوې ده، چې د افغانستان فوټبال ملي لوبډله د سپټمبر میاشتې په ۸ مه نیټه د روسیې په کوربتوب ۲۰۱۸ م ز کال فوټبال نړېوال جام سیالیو ته دلارې موندنې په موخه د اسیا په لومړي پړاو ټاکنیزو سیالیو په دوام په خپل (اي) ګروپ کې دریمه لوبه له جاپان فوټبال ملي لوبډلې سره ترسره کړي.
په روانو لوبو کې افغانستان تراوسه ۲ لوبې کړي، چې کمبودیا ته یې ۰-۱ ماتې ورکړې، خو له سوریې څخه یې ۰-۶ ماتې خوړلې ده او په خپل ګروپ کې دریم مقام له ځان سره لري.
