.jpg)
د کوریا لوبډلې په فاینل لوبه کې فرانسې ښځینه فوټبال ملي لوبډلې ته ماتې ورکړه او د دویم ځل له پاره اتله شوه.
د ۲۰ کلنو ښځینه فوټبال نړیوال جام سیالۍ له تېرې یوې میاشتې راهیسي د فوټبال نړیوالې شورا (فیفا) له خوا د (پي این جي) هېواد په کوربتوب پیل شوې وې.
د سیالیو د رسمي وېبپاڼې د معلوماتو له مخې، په فاینل لوبه کې له یوې یو اړخیزې لوبې وروسته شمالي کوریا لوبډلې ۳ د ۱ ګول پر وړاندې فرانسه له ماتې سره مخ کړه.
په سیالۍ کې لومړی ګول د لومړۍ نیمایي پر ۱۷ مه دقیقه فرانسې وکړ؛ خو وروستي درې واړه ګولونه د لوبې پر ۳۰ مه، ۵۵ مه او ۸۷ مه دقیقه کې شمالي کوریا ووهل او د اتلولۍ جام یې ترلاسه کړ.
شمالي کوریا مخکې ۲ د ۱ ګول پر وړاندې امریکا ته او فرانسې بیا ۲ د ۱ ګول پر وړاندې جاپان ښځینه فوټبال لوبډلې ته ماته ورکړې وه او پای لوبې ته رسېدلی وې.
.jpg)
د شمالي کوریا د لومړي او فرانسې د دویم مقام نه وروسته جاپان لوبډلې ۱ د ۰ ګول پر وړاندې د امریکا ښځینه فوټبال ملي لوبډلې ته ماته ورکړه او درېیم مقام یې ترلاسه کړ.
د (پي این جي) په کوربتوب د ۲۰ کلنو ۸م پړاو ښځینه فوټبال نړیوال جام سیالۍ د نومبر پر ۱۳ مه نېټه د ۱۶ هېوادونو ترمنځ پیل شوې وې، چې په ۴ بېلابېلو لوبغالو کې وشوې.
د ۲۰ کلنو ښځینه فوټبال نړیوال جام سیالیو وروسته جاپانۍ حنا سوګیتا غوره لوبغاړې او فرانسوۍ میلین غوره ګول ساتونکی اعلان شوه.
دغه راز د اخلاقو د کپ جایزه هم جاپانۍ ۲۰ کلنې ښځینه فوټبال لوبډلې ته ډالۍ شوه.
د سږ کال په نړیوال جام سیالیو کې ټولټال ۳۲ سیالۍ وشوې، چې د برازیلۍ ناني، جاپانۍ مامي او سویډنۍ سټینا د ۵ زیاتو ګولونو په وهلو سره په کې ټولټال ۱۱۳ ګولونه ووهل شول.
د شمالي کوریا د دوو اتلولیو ترڅنګ د ۲۰ کلنو په ښځینه فوټبال نړیوال جام سیالیو کې المان او امریکا درې پر درې مخکښ هېوادونه شمېرل کېږي.
