د افغانستان او جاپان د فوټبال ملي ټيمونو لوبه، چې نن پنجشنبه (مارچ۲۴مه) د هېواد پر مهال ۳:۰۰ بجې پېل شوه، د جاپان د فوټبال ملي ټيم وکولای شو، چې افغانستان ته ۵ پر وړاندې د صفر ماته ورکړي.
لوبه د پېل نه د جاپان په ګټه روانه وه، ځکه جاپاني لوبغاړو د لوبې له شروع کېدو سره سم د افغانستان پر دروازې بريدونه پېل کړل.
د اټکل له مخې شاوخوا ۹۵ سلنه د افغانستان پر دروازه د جاپان له خوا بریدونه وشول، چې پر زیاتو ګولونو بریالي هم نه شول.
د کارپوهانو په وینا، د لوبې په لومړيو دقیقو کې افغانستان نسبتاً ښه دفاعي لوبه وکړه او تر ۳۰ دقیقو پورې د افغانستان د ملي ټيم لوبغاړو د خپل ګول ښه ساتنه وکړه، خو له هغه وروسته بیا نتیجه برعکس شوه او جاپاني لوبغاړو وکولای شول، چې ۵ ګولونه د افغانستان دروازې ته ووهي.
یاده دې وي، چې له دې وړاندې د افغانستان د فوټبال ملي ټيم روزونکي پيټر شګرټ د یوې خبري ناستې په ترڅ کې ویلي و، چې د جاپان د ټیم حمله يي لوبه به د افغانستان له پاره ډېره سخته تمامه شي، خو هغه ویلي و، چې د افغانستان ملي ټيم د دفاع له پاره پوره چمتووالی لري.
پټه دې پاتې نه وي، چې د جاپاني لوبغاړو د ملاتړ له پاره ۷۵ زره جاپانیان د فوټبال میدان ته ورغلي و.
د ویلو ده، چې له دې وړاندې هم د افغانستان ملي ټيم د جاپان له ملي ټيم سره د فوټبال لوبه کړې وه، چې په پای کې يې افغانستان ته ۷ پر وړاندې د صفر ماته ورکړې وه.
