پر ایران له اقتصادي بندیزونو له لرې کیدو وروسته افغانستان ته د ایراني توکو پر وارداتو له ۶۰ سلنو زیات لګښت کم شوی.
د هرات د سوداګرۍ او صنایعو خونې رییس سعد خطیبي وایي، وروسته له هغه چې اروپایي ټولنې او امریکې پر ایران بندیزونه لرې کړل، د ایران له لارې افغانستان ته د سوداګریزو توکو د کانټینرونو لیږد لګښت له ۲۵۰۰ ډالرو څخه ۷۰۰ ډالرو ته رالویدلی دی.
خطیبي زیاته کړه، چې اوسمهال په ورځ کې د سوداګریزو توکو له ۱۰۰ زیات کانتینرونه، د ودانیو توکي او خوراکي شیان له اروپایي او اسیاسي هیوادونو په ځانګړې توګه چین، هند او ځینې عربي هیوادونو له ایران بندرونو څخه هرات ته راوړل کیږي.
دی وایي پرایران د بندیزونو په لرې کیدو افغان سوداګرو ته ډیرې اسانتیاوې برابرې شوې دي.
د نوموړي پر وینا، په دې سره، د ایران له لارې نړیوالو بانکونو ته د ترانزیتي توکو اخېستو له پاره د پیسو لیږد ستونزه هم هواره شوې ده.
خو د هرات د صنعت ګرانو ټولنې رییس حمیدالله خادم پر حکومت نیوکه کوي او وایي، سره له دې چې د ایران له لارې افغانستان ته د وارداتي توکو د لیږد لګښت کې د پام وړ کموالی راغلی، خو بیا هم د هیواد په بازارونو کې د دغو توکو بیې نه دي ټیټي شوي.
افغانستان ته د ایران بندرونو له لارې د سوداګریزو توکو لیږد بیه په داسې حال کې راټیټیږي، چې د امریکې ولسمشر باراک اوباما د روان کال جنوری میاشت کې پر ایران لګیدلي اقتصادي بندیزو لرې کیدو حکم صادر کړ.
