جمهور رییسلیک سرایی نینگ بلند مرتبهلی رسمیلری، جمهور رییس غنی تینچلیک مذاکرهلر اوچون انیق موقفگه ایگه لیگینی ایتگنلر.
جمهور رییس سوزچیسی اجمل عابدینینگ، سلام وطندار بیلن بولگن صحبتیده، جمهور رییس غنی تینچلیک مذاکرهلر باره سیده افغانستان خلقیگه معلومات بیریشنی ایتگن.
عابدی، هنوزگچه افغانستان دولت قوراللی مخالفلری بیلن حکومت دنیا نینگ هیچ بیر مملکتیده رسمی و نا رسمی شکلده مذاکره اوتکزمه گن.
ایچکی و تشقی عاموی اخبارات واسطهلری اوچ آیدن بیری افغانستان حکومتی بیلن دولت قوراللی مخالفلری اورته سیده قطرده مذاکره باشلنگنلیگی باره سیده خبر بیرشماقده لر. اما، جمهور رییسلیک سرایی و عالی تینچلیک کینگشی اوشبو گزارشلرنی رد قیلگن.
شونینگ دیک اوتگن کون هم عاموی اخبارات واسطهلریده تینچلیک مذاکره اوتکزیش اوچون طالبلرنی نماینده سی کابل گه کیلگنلیگی حقیده خبرلر ترقهتیلدی.
لیکن، جمهور رییسلیک سرایینینگ سوزچیسی بو مساله حقیده کیین کوپراق معلومات بیریلیشینی ایتگن.
اوتگن کون ایریم عاموی اخبارات واسطهلری، قطرده طالب سیاسی اداره سی نینگ اعضاسی قاری دین محمد ترکیه مدیاسی بیلن بولگن صحبتده، تینچلیک مذاکرهلر کیلگوسی هفته کابلده باشله نیشی کوتیلیشینی ایتگن ایدی.
بو توغریده ترکیه نینگ آناتولی خبر آژانسلیگی نینگ یازیشیچه، افغانستان حکومتی بیلن تینچلیک مذاکرهگه اولتیره دیگن طالبلر نماینده سینی ملا محمد عمر اوزی طالبلر باشقه بلند مرتبهلی رسمیلری مصلحتی اساسیده تنلیدی.
تینچلیک کینگشی نینگ معاونی عبدالحکیم مجاهد نینگ سلام وطندارگه ایتشیچه، مذکور کینگش هنوز هم اوتکزیلهجک مذاکرهلر اوچون جریانگه قوییلمه گن.
مجاهدگه کوره، برچه تامانلر تینچلیک مذاکره گه قیزیقهدی. «اما، هنوز گچه هیچ قندهی رسمی و نارسمی تینچلیک مذاکره اوتکزیلمه گن، شونینگدیک مذاکرهنی وقتی هم تعین ایتیلمه گن»
سیاسی تحلیلچی و یازووچی محمد حسن حقیارنینگ سوزلریگه کوره، کابلده تینچلیک مذاکره باشلنگنلیگیگه عاید هیچ قندهی خبر موجود ایمس، اما، تامانلرنی تینچلیک مذاکرهگه تیارلش اوچون سعی وحرکتلر دوامی بار.
جناب حقیارگه کوره: « مین تَنیدیگن طالبلر همده اولرنی موقفینی بیلشیمچه، طالبلر تیزلیکده افغانستانگه کیلیب تینچلیک مذاکرهگه باشلیمیدلر».
جناب حقیارنینگ سوزلریگه قره گنده، تینچلیک مذاکره اوچون طالبلرنی کوندیریشگه جدی صورتده سعی و حرکتلر موجود.
