جوزجان ولایتینینگ درزاب تومنیده داعش گروهی «ماهواره، تلویزیون، تاووق گوشتی، سگرت و ناس» ساتیلیشینی منع اعلان قیلدی.
درزاب تومنی سرپرستی بازمحمد داورنینگ سلاموطندارگه ایتیشیچه، داعش جنگریلری بو قانوندن باش تارتگنلر جزالنیشینی بیلدیرگن.
داورگه کوره، اوتگن کون داعش جنگریلری بو آگاهلنتیریشگه قوشیمچه، اوشبو تومنده ناس ساتیلهدیگن دکانلرنی یاپگن.
بازمحمد داورنینگ ایتیشیچه، درزاب تومنی بیر ییلدن بویان داعش گروهینینگ تهدیدی آستیده بولگن، بیراق حکومت کوچلری، شونچه مدتده بو تومننی داعش جنگریلریدن تازهلش اوچون هیچ بیر عملیات یولگه قویمهگن.
شونینگدیک، درزاب تومنی دکاندارلرینینگ ایتیشیچه، اوتگن کون داعش جنگریلری «ماهواره، تلویزیون، تاووق گوشتی، سگرت و ناس» ساتیلمهسی اوچون بیر اعلامیه ترقهتگن. دکاندارلرگه کوره، اعلامیهده موضوع دن باش تارتگنلر جزالنیشی بیلدیریلگن و تکرار بولگنده «هلاک» ایتیلهدی.
اولرگه کوره، درزاب عملیاتی خصوصیده حکومتنینگ دقت سیزلیگی باعث، هر کون اونلرچه قیینچیلیککه روپهره بولهدیلر.
بیراق، درزاب پولیسی قومندانی تورن اسماعیلنینگ ایتیشیچه، بو قانون یالغیز بیر قیشلاق اوچون صادر ایتیلگن و درزاب مرکزیده وضعیت یخشی دیر.
لیکن، داعش گروهی حاضرگچه بو موضوع خصوصیده، میدیاگه رسمی شکلده بیر نرسه دیمهگن.
