په اصلاحاتو او ښې حکومتولۍ کې د ولسمشر پخوانی ځانګړی استازی احمدضیا مسعود وايي، ولسمشر محمد اشرف غني هېڅ حق نهلري، چې دی له دندې ګوښه کړي.
نوموړي د یوې خبري ناستې پر مهال دا هم وویل، چې دا حکومت د یو مصلحت پر بنسټ رامنځته شوی او د ده له موجودیت پرته به حکومت نیمګړی وي.
احمدضیا مسعود زیاته کړه، دی له خلکو سره په مشورو بوخت دی او له ولسمشرغني يې هیله ده، چې د ده په اړه له خپلې پرېکړې تېر شي.
مسعود ولسمشر ته په خطاب کې وویل، سیاسي بې ثباتۍ او کورنۍ جګړې ته دې زمینه نه برابروي او ولس نور د دې حالت د دوام تحمل نه لري.
دی وايي، "له دندې لرې کول به یې په کور د ننه د جګړې لامل شي."
ضیا مسعود په دې خبري غونډه کې دا هم وویل، چې د ده د لرې کېدا په اړه د ولسمشر د اجرایوي مشر ډاکټر عبدالله عبدالله سره هم مشوره نهده شوې.
په اصلاحاتو او ښې حکومتولۍ کې د ولسمشر ګوښه شوی پخواني استازي زیاته کړه، چې دی د خپلې ګوښه کېدنې په باب هېڅ معلومات نه درلود.
یاده دې وي، چې تېره شپه د ارګ له لوري خبرپاڼه خپره شوه، چې احمد ضیا مسعود د ولسمشر د فرمان په اساس لهدندې ګوښ شویدی.
د افغانستان د چارو ادارې په رسمي پاڼه کې د احمدضیا مسعود د ګوښه کېدو خبر رسمي تایید شویدی.
د چارو ادارې په خپلې پاڼې کې په ډېرو لنډو ټکو لیکلي: «د اساسي قانون د ۶۴مادې او ۱۳ مې فقرې پر بنسټ په اصلاحاتو او ښې حکومتولۍ کې د ولسمشر ځانګړي استازي احمدضیا مسعود له دندې د عزل کېدل منظور شو.»
په پاڼه کې د احمدضیا مسعود له دندې د لرې کېدو اصلي لامل او نورو په باب نور جزیات نهشته.
احمدضیا مسعود، په تېرو ولسمشریزو ټاکنو کې د اوسني ولسمشر اشرف غني په مشرۍ د تحول او تداوم د ټیم پلوی و.
له بل لوري عطامحمد نور هم پهدې اړه د حکومت پر اجرایوي مشر ډاکټر عبدالله نیوکې کړي او ویلي دي، چې ډاکټر عبدالله باید په دغه برخه کې د مسعود کورنۍ ته ځواب ورکړي.
هغه په خپلې فېسبوک پاڼه کې لیکلي، چې موږ د ډاکټر عبدالله غبرګون ته منتظر یو.
