د احمد شاه مسعود ورور احمدولي مسعود وايي، دوه ورځې مخکې ولسمشر محمد اشرف غني ترکمنستان کې د اوسپنې پټلۍ پرانستلو پرمهال امان الله خان يي ملي قهرمان یاد کړ، په داسې حال کې چې د ملي قهرمانۍ لقب د لويې جرګې له خوا په رسمي ډول احمد شاه مسعود ته ورکړل شوی دی.
احمدولي مسعود د چهارشنبې پر ورځ کابل کې خبري غونډې ته زیاته کړه، چې د افغان ولسمشر غني له خوا امان الله خان ملي قهرمان یادول ناسم کار دی.
دی چې د "شهید احمد شاه مسعود" په نوم د یو بنسټ مشر هم دی زیاتوي، ولسمشر دې، امان الله خان ملي قهرمان نه بولي ځکه دغه لقب د اساسي قانون لويې جرګې په رسمي ډول احمد شاه مسعود ته ورکړی دی.
دغه بنسټ وايي، که څه هم دوی د هېواد ملي اشخاصو ته احترام لري، خو له حکومته هم غواړي چې د افغانستان ملي او میلیتي پيژندل شویو اشخاصو په هکله د احترام اصل په پام کې ونیسي.
احمد ولي مسعود د حکومت له مشرانو غواړي چې ژر تر ژره دې ددغو خبرو په تړاو وضاحت ورکړي.
هغه وویل: " دغه ډول حرکتونه او خبرې ریښتیاهم چې خلک غولوي او خلک له یو بل څخه لرې کوي دغه خبرې د افغانستان ماتوونکی حالت نور هم زیاتوي".
هڅه مو وکړه، چې د ولسمشر له خوا امان الله خان ته قهرمان ویلو په تړاو د ولسمشرۍ ماڼۍ نظر هم ولرو، خو د ارګ مطبوعاتي مسوولين د دغې موضوع په تړاو خبرو کولو ته چمتو نه شول.
