څو ورځې وړاندې د طالبانو لوړپوړي غړي مولوي محمدعلي جان احمد ومنله چې د دوی مشر ملا هبتالله پر کورونا ويروس اخته شوی دی.
مولوي محمدعلي جان احمد له فارن پاليسۍ سره په خبرو کې ويلي و چې د دوی رهبر ناروغ دی؛ خو روغتيايي حالت يې اوس ښه دی.
اوس په تازهګۍ سره فارن پالیسۍ نشریې ته یو شمېر سرچینو د نوم د خپرولو په شرط ویلي چې ملا هبت الله په کرونا ویروس اخته شوی و او ښايي د همدې ناروغۍ له کبله مړ شوی وي؛ خو تر اوسه پورې دا خبر رسمي نه دی تاييد شوی. د دوی په وينا، ملا هبتالله د درملنې پر مهال مړ شوی دی.
افغان لوړ پوړي چارواکي ويلي چې په دوحه کې د طالبانو پلاوي پر کورونا اخته شوي؛ خو په ځانګړې توګه يې د چا نومونه نه دي ياد کړي.
يادې سرچينې فارن پاليسۍ ته ويلي چې پر کورونا ويروس د طالبانو د مشر اخته کېدل به د افغان سولې خبرې له بنبست سره مخ کړي او اوربند به هم ونه شي.
د طالبانو هغه غړي چې وايي مشر يې د کورونا له کبله مړ شوی وايي، له ۳ مياشتو راهيسې له خپل رهبر نه احوال نه لري او نه يې هم کوم تصويري يا غږيز پيغام ورته لېږلی. د دوی په وينا، مشر يې حتا د اختر په مناسبت هم دوی ته کوم پيغام نه دی لېږلی.
مولوي محمد علي جان احمد يوازې د دې خبر ورکړی و چې ملا هبتالله ناروغ دی او روغتون کې تر درملنې لاندې دی؛ خو د روغتون په اړه چې کوم روغتون کې دی، څه نه و ويلي.
