ملی بیرلیک حکومتی ایجاد ایتیلگن‌دن کیین اجراییه باشلیغی ایلک بار ایران سفر قیله‌دی.
مملکت اجراییه باشلیغی عبدالله‌عبدالله بوگون (دوشنبه) رسمی بیر تشریف بیلن تهران باردی.
اجراییه ریاستی مطبوعات ادارهسی‌نینگ سوزلاووچی‌سی مجیب رحیمی سلام‌وطندار بیلن قیلگن صحبت‌ده، منطقه‌ده‌گی خوف‌سیزلیک تهدیدلرگه قوشمه قرشی کوره‌شیش، رسمی تهران بیلن کابل تجاری علاقه‌سی مستحکم‌له‌نیشی و شونگه اوخشه‌گن مساله‌لر جناب عبدالله‌نینگ سفریده محاکمه ایتیله‌دی دیگن.
شونینگ‌دیک افغانستان جمهور رییسی محمد اشرف‌غنی اوتگن هفته، ایران همکارلیگی‌ده قوریق بندر ایجاد ایتیلیشی اوچون قرار آلینگنی باره‌سی‌ده تاکیدله‌گن ایدی. بو لایحه عملی ایتیلیشی بیلن افغانستان و هندوستان اورته‌سی‌ده‌گی تجاری علاقه یخشی‌له‌نیشی اوچون ایران چابهار بندری ییریک رول اوینه‌شی تاکیدلنه‌دی.
جناب رحمی، حکومت اجراییه رییسی اوشبو سفرده ایران دولت بلند مرتبه‌لی رسمیلری بیلن اوچره‌شیب ملاقات اوتکزیش‌دن علاوده، چابهار بندرینی یقین‌دن کوریشی‌نی تیل‌گه آلگن.
چابهار بندی ایران‌نینگ جنوب شرقی‌ده‌گی بلوجستان و سیستان ولایت‌لری ارا جایلشگن. بو بندر ایسه افغانستان و ایران اوچون اولکن اقتصادی اهمیت‌گه ایگه.
افغانستان دولتی ایران چابهار بندرینی پاکستان‌نینگ کراچی و واگه بندلری بدیلی صفتی‌ده قره‌یدی. افغانستانلیک تاجرلر دایم پاکستان بندلریده تورلی قیین‌چلیکلر بیلن روپه‌ره بولیب کیلگن و پاکستان ایسه افغان تاجرلری‌نینگ تَوَر صادر قیلیش و کیلتیریشی اوچون ایریم بهانه‌لر بیلن چیکلاو یره‌ته‌دی.
ایران چابهار بندریدن فایده‌له‌نیش اوچون 2012- ییل‌دن بیری افغانستان، ایران و هندوستان بلند مرتبه‌لی رسمیلری اورته‌سی‌ده مذاکره اوتکزیلگن. میلادی اوتگن ییل (ریکا) یا افغانستان اوچون منطقه‌یی اقتصادی همکارلیکلرنینگ کابل‌ده اوتکزیلگن آلتینچی ییغینی‌ده اوچ مملکت یوقاری مرتبه‌لی رسمیلری، مذکور بندر کیلیشووی اوستی‌د‌ه تیزلیک‌ده نهایی نتیجهگه ایریشیلیشی باره‌سی‌ده خبر بیرگن ایدیلر.
ایران، مذکور منطقه‌ده افغانستانلیک تجارلر فایده‌له‌نیشی اوچون 50 هکتار ییرنی اختیارلریگه قویگن.
شوکبی اجراییه ریاستی‌نینگ سوزلاوچی‌سی، سفرده افغانستان و ایران دولتی ارا فرهنگی علاقه‌لر حقیده هم بحث آلیب باریلشی‌نی بیلدیرگن.
