امنیتی رسمیلر جاری ییل جریانیده قوراللی طالبلرنینگ فعالیتلری کوپهییشیدن خبر بیرهدی. ملی امنیت ریاستینینگ سرپرستی مسعود اندرابینینگ ایتیشیچه، طالبلر حربی و سیاسی فعالیتلرینی کوپهیتیریش اوچون سعی و حرکت قیلهدی.
جناب اندرابینینگ ایتیشیچه، اوشبو گروه البدر مجاهدلری، طیبه و جیش محمد لشکرلرینینگ همکارلیگیده مقصدیگه ایریشیش اوچون کورهشهدی.
نمایندهلر کینگشیده سوزگه چیقگن ملی امنیت سرپرستی اوشبو مطلبنی بیان ایتیب ایسلشیچه، بو فعالیتلر باشقریلیشی اوچون ییترلیچه تیارگرلیک آلینگن.
اندرابینینگ ایتیشیچه، امنیتی ادارهلر اوتگن ییل طالبلرنینگ کمیده 4 مینگ هجومینی باشقرگن.
نمایندهلر کینگشینینگ بوگونکی ییغینیده، ملی حربی باش قومندانی قدمشاه شهیم، مملکت امنیتی تأمین ایتیلیشی خصوصیده، 5 ییللیک لایحه تیارلنگنیدن خبر بیریب ایتیشیچه، اوشبو لایحه ورسا ییغینیده بیان ایتیلهدی.
جناب شهیم، برچه امنیتی ادارهلردن اویغونلیکده حرکت قیلیشلرینی سورهدی. مملکت ولایتلری و تومنلر سقوطی اوچون معاملهلر توغریسیدهگی مُش- مُشلر بارهسیده ایتیشیچه، بو توغریده هیچ بیر معامله یوق دیر و طالبلرنینگ هجومینی باشقریش اوچون، انچه مدتدن بویان آلتی ولایتده شفق ناملی عملیات یولگه قوییلگن.
ملی حربی باش قومندانینینگ ایتیشیچه، مملکت تینچلیگی و برقرارلیگینی تأمینلش اوچون هیچ قندهی سعی و حرکتدن وازکیچمهیدی و اوتگن ییللرگه نسبَتن جاری ییل امنیتی یخشیراق تأمین ایتیلیشی خصوصیده ایشانچ بیرهدی.
