.jpg)
د حکومت اجرایوي ریاست ویاند مجیبالرحمان رحیمي په کابل کې د یوې خبري ناستې په ترڅ کې وویل، چې پر پارلماني د ریاستي نظام بدلول د اجرایوي ریاست یوه له اساسي موخو څخه بلل کيږي.
نوموړي چې نن پنجشنبه(جنوري۱۹) خبریالانو سره خبرې کولې زیاته کړه، اجرایوي ریاست د اساسي قانون پر تعدیل او د واک په غیر متمرکز کولو ټینګار کوي.
هغه وویل: "یو ځل بیا د اساسي قانون تعدیل او پر پارلماني د ریاستي نظام بدلون د اصلاحاتو او همپالنې ټیم موخو په توګه وړاندې کوو اجرایوي ریاست پر دې ژمنې ولاړ دی".
په همدې حال کې د "موج تحول افغانستان" په نوم بنسټ هم نن د یوې خبري غونډې په ترڅ کې پر پارلماني د ریاستي نظام بدلولو غوښتنه وکړه.
خبري غونډې ته د ولسمشر پخواني مرستیال محمد یونس قانوني وویل، چې د اوسنیو ټولو ستونزو هوارولو او ټولو قومونو ته په واک کې د ونډې ورکولو لهپاره پارلماني نظام یوازینۍ حل لار ده.
د قانوني پر وینا، د اساسي له تصویب مخکې دوه مسودې چمتو شوې وې، چې یوه يې د پارلماني او ریاستي مختلط او بله يې د ریاستي نظام مسوده وه، خو د نوموړي پر خبره هغه نسخه، چې د پارلماني نظام مسوده وه ورکه شوه.
دا څرګندونې په داسې حال کې کيږي، چې د بلخ ولایت ځایناستي والي عطا محمد نور له اجرایوي مشر عبدالله عبدالله سره د اختلاف لامل د سیاسي هوکړه لیک هیرول بولي.
خو د اجرایوي ریاست ویاند وايي، چې دوی د هیواد ګټو او مصلحت ته په کتو د خپلو ژمنو پلی کولو هڅه کوي.
اجرایوي ریاست وايي، چې که د سمون په لار کې هر اړخیزه همکاري شوې وای د سیاسي هوکړهلیک مواد به څو میاشتې مخکې عملي شوي وای.
دا په داسې حال کې ده، چې څو ورځې وړاندې د ولسمشر سرسخت سیاسي رقیب، د بلخ ځایناستي والي عطامحمد نور له ولسمشر سره د خپلو اختلافاتو د حل خبر ورکړ.
د ده دغه خبره د زیاتو رسنيو د خبرونو په لومړیتوب کې ځای ونیوه.
له هغه وروسته د ډاکټر عبدالله عبدالله او د عطامحمد نور ترمنځ د اختلافاتو د پېدا کېدو اوازې هم ګرمې شوې.
عطامحمد نور وویل، چې غواړي له بلخ ولایت نه پلازمینې کابل ته راشي او خپلو سياسي فعالیتونو ته له همدې ځایه دوام ورکړي.
