خپاره شوي وايي، چې د طالبانو استخباراتو مشر ملامحمد زی د کوټې ښار ته نږدې په "دکوچلا" سیمه کې او د دغې ډلې د استخباراتو مرستیال محمد عیسی د کوټې ښار په غوث اباد سيمه کې د پاکستان د استخباراتي ادارې له خوا نيول شوي دي.
په کوټه کې ليکوال او ازاد خبريال رزاق برق سلام وطندار ته وویل، چې دغه کسان د پاکستان استخباراتي ادارې له خوا په دې تور نيول شوي، چې له داعش ډلې سره يې مرسته کوله.
د هغه پر خبره له دې سره جوخت د بلوچستان په کوټې ښار کې تېره ورځ چاودنه شوې، چې د چاودنې له امله د پاکستان ۴ نظامي ځواکونه و وژل شول.
له چاودنې وروسته د پاکستان پوځ ۳۴ تورن کسان نيولي، چې په هغه کې د طالبانو د استخباراتي ادارې کارکوونکي هم شامل دي او داسې هم ويل کيږي، چې دغه پېښه د طالبانو د استخباراتي چارواکو له نيولو سره نېغ په نېغه تړاو لري.
په همدې حال کې د طالباني چارو کارپوه جاوید کوهستاني وايي، چې ملاحمدزی او مرستیال يې محمد موسی دواړه هغه کسان دي، چې ملامنصور ته ډېر نږدې دي او د طالبانو په منځ کې ډېر نفوذ لري.
هغه له داعش سره د دوی د اړيکو درلودلو خبره ردوي، خو وايي چې دا پر پاکستان د زیاتو سیاسي فشارونو نتیجه ده.
کوهستاني زیاتوي، چې پاکستان مجبور شوی، چې اوس له افغان حکومت سره د سولې پروسه ګړندۍ کړي او په ښه توګه يې پرمخ بوځي.
د طالباني چارو دغه کارپوه په دې نظر هم دی، چې پاکستان د وسله والو طالبانو له ځپلو سخت ویريږي او وايي، پاکستان له دې ويريږي، چې کېدی شي همدغه ځپل شوي طالبان له پاکستاني طالبانو سره يوځای شي او د دغه هېواد پر ضد خپلو فعاليتونو ته دوام ورکړي.
دی وايي، چې د دې کسانو نيول ښايي د افغان چارواکو په غوښتنه شوي وي.
د طالبانو د استخباراتو د رییس مرستیال محمد موسی، ملامحمد عمر ته له نیږدې کسانو څخه و او د طالبانو د واکمنۍ پرمهال یې د کندهار د والي په توګه دنده يې هم ترسره کړې وه.
