جمهوررئیس‌لیک سرایی بیر خبرنامه ترقه‌تیب ایتیشیچه، مملکت جمهوررئیسی محمداشرف غنی، افغانستان تینچلیگی بوییچه آمریکا خاص نماینده‌سی زلمی خلیلزاد بیلن اوچره‌شیب و ایکی تامان افغانستان‌لیکلرارا سوزلشوولر باشله‌نیشی حقیده صحبت اوتکزگن.
اوشبو خبرنامه‌ده کیلیشیچه، بو اوچره‌شوو اوتگن کون (چهارشنبه 8- اسد) کیچ قورون ملی مصالحه عالی کینگش باشلیغی عبدالله عبدالله نینگ حضوری بیلن صورت تاپگن.
خبرنامه نینگ کوپه‌یتیریشیچه، جناب غنی و خلیلزاد آتیش کیسین دوام ایتیشی، زوروانلیکلر کمه‌یتیریلیشی، دولت و طالبان گروهی آره‌سیده یوزمه‌یوز مذاکره باشله‌نیشی و محبوسلر اَلمشتیریلیشی اوستیگه بحث قیلگن.
شونینگدیک ملی مصالحه عالی کینگشی بیر خبرنامه ترقه‌تیب ایتیشیچه، مذکور اوچره‌شووده جناب عبدالله و خلیلزاد محبوس‌لرنی اَلمشتیریش پروسه نهایی بولیشی، آتیش کیسین و افغانستان دولتی و طالبان گروهی آره‌سیده یوزمه‌یوز مذاکره باشله‌نیشی حقیده سوزلشگن.
مذکور کینگش نینگ کوپه‌یتیریشیچه، ایکی تامان افغانستان حکومتی و طالبان گروهی تامانیدن 3 کون‌لیک آتیش کیسین اعلام ایتیلگنی نی خوش قرشی‌لب و مذاکره باشلنمه‌سیدن آلدین زوروانلیکلر کمه‌یتیریلیشی توغریسیده امیدوارلیک بیلدیریشگن.
افغانستان دولتی و طالبان گروهی قربان هییت بیره‌م مناسبتی بیلن اوچ کون‌لیک آتیش کیسین اعلام قیلیشدی. بیراق بو آتیش کیسین تمدید بولیشی یا-ده بولمه‌یشی حاضرگچه بیللی بولمه‌گن.
