بوگون (چهارشنبه) نمایندهلردن بیر قطاری مجلسنینگ عمومی ییغینیده، مملکت بویلب ایجاد ایتیلهدیگن سیاسی ائتلافلرنی عیبلب، حکومت ایچیده بولیب تورگن شخصیتلر تامانیدن ایجاد ایتیلگن ینگی ائتلاف، حاضرگی وضعیتده حکومت نفعیگه ایمس دیدیلر.
نمایندهلرگه کوره، بونقه ائتلافلر افغانستان نفعیگه ایمس و کوپراق اولردن مملکت دشمنلری استفاده قیلیشی ممکن.
مجلسنینگ اعضالریدن نظیفه ذکینینگ ایتیشیچه، «حکومت ایچیده بولیب، شوحکومتدن آیلیک آلیب، ینه حکومتنی ضعیف قیلیشده تلاش قیلهدیگنلر آلدینی آلیش لازم.»
خانم ذکی جمهور رییسدن حکومت پولیدن، حکومتگه قرشی استفاده قیلهدیگنلرنی تیزلیکده ایشدن آلیشینی طلب قیلگن.
بیراق مجلسنینگ بیرینچی اورین باسری همایون همایون، حکومتنی عیبلش و حکومتنی تنقید قیلیش اوچون ائتلاف قوریش هر بیر یشاوچینینگ حقی و بونقه حرکتلر نظامنی ضعیفلش اوچون ایمس، بلکه مملکتده تینچلیک و برقرارلیک کیلیشیگه سبب بولهدی دیگن.
مجلسنینگ باشلیغی عبدالرؤوف ابراهیمی هم، مملکت حاضرگی وضعیتیده ایجاد ایتیلهدیگن ائتلافلر یشاوچیلر ارا ایریم تشویشلرنی توغدیرگن.
جناب ابراهیمیگه کوره، حاضرگی نظامگه بدیل یوق و شو اوچون سیاستچیلر نظامگه اصلاحات کیلتیریش اوچون تلاش قیلشلری کیرهک دیگن.
شونینگدیک سونگی کونلرده افغانستان سابق ملی امنیت باشلیغی رحمتالله نبیل و ملی امنیت سابق مصلحتچیسی رنگیندادفر اسپنتالر اشتراکیده محور مردم نامیده حزب تشکیل ایتیلدی. اوشبو حزبده سابق حکومت دوریدهگی رسملریدن کوپیسی کورینردی و جمهور رییسنینگ بیرینچی اورین باسری جنرال عبدالرشید دوستم، بلخ حاکمی عطامحمدنور و اجراییه ریاستی نینگ ایکینچی اورین باسری حاجی محمد محققلر ایسه افغانستاننی قوتقریش نامیده ینگی بیر ائتلاف تشکیل بیردیلر.
سیاسی تحلیلچیلرگه کوره، ینگی ائتلافلر و سیاسی حزبلر مملکتنی یوکسهلیش تامان آلیب بارهدی.
تحلیلچیلر، حکومت منتقدلری تامانیدن ایتلاف تشکیل ایتیلیشی حکومتگه قرشی قورال کوتاریب اوروش قیلیشدن کوره یخشی دیب بیلهدیلر.
