تعلیم و تربیه ساحهسی نینگ بیر قنچه متخصصلری، معارف وزیرلیگیدهگی کوچسیزلیک و ایشسیزلیک همده تعلیم و تربیه بولیمی بیلن سیاسی یاندهشیلیشی معارف وزیرلیگی نینگ کوپینچه ملازملری شخصی علاقهلر اساسیده ایشگه آلینهدیلر دیدیلر. معارف وزیرلیگی ملازملری ایشگه آلینیشیده مسلک و تخصص ایمس بلکه شخصی علاقهلر مهم رول اوینهشی ایتیلهدی. شونینگ اوچون معارف تیزیمی جدی زیان کورماقده دیگن متخصصلر.
سلامطوندارگه صحبت بیرگن افغانستان معارف وزیرلیگی نینگ سابق اورین باسری محمدصدیق پتمن، حکومت سونگی اون بیش ییل ایچیده معارف سیستیم بیلن سیاسی یاندهشیب کیلگن دیدی. هیچ بیر زمان مسلکی همده تخصصی بولگن انسانلر بو بولیمگه وظیفهلنتیریلمهگن دیدی جناب پتمن. سیاسی یاندهشیشدن علاوه مَلکهلی اوقیتوچیلر، درسلیک کتابلر وقتیده ییتیشتیریلمسلیگی، بنا یوقلیگی و اورگهتیش سیستم ایسکرگنلیگی معارف وزیرلیگی روپه ره بولیب تورگن قیین چیلیکلر جملهسیدن دیگن جناب پتمن.
تعلیم و تربیه ساحهسی نینگ باشقه بیر متخصصی جناب معین مرستیال، معارف وزیرلیگی نینگ مهم لوازملریگه شخصلر مسلکی نقطه نظردن ایمس بلکه سیاسی و تنظیمی آدرسدن جایلشتیریلهدی دیگن. شونینگ اوچون هم معارف وزیرلیگیگه متخصص کیشیلر یول تاپمهیدی دیگن جناب مرستیال.
بو توغریده افغانستان معارف وزیرلیگی فکرینی اورگهنیش اوچون سعی وحرکت آلیب باردیک، لیکن بو حرکتیمیز نتیجه بیرمهدی.
بوندن آلدین هم مملکت معارف وزیرلیگی بیلن سیاسی یاندهشیلیش، فساد و کوچسیزلیک حاکملیگی بار- بار تنقید آستیگه الینگن. اما، بو معما فر طرف ایتیلیشی اوچون هنوزگچه هم ملی بیرلیک حکومتی رهبری جدی آدیم کوتارمهگن.
