اوتگن کون آمریکه مدافعه وزیری جیمز متیس، اعلام ایتیلمهگن بیر سفرده کابل کیلدی.
جناب متیس بو سفرده افغانستان بلند مرتبهلی رسمیلری بیلن اوچرهب و سوزلشوو اوتکزدی.
گزارشلر اساسیده، تینچلیک پروسهسی و مملکتنینگ خوفسیزلیک وضعیتی، متیس جنابلرینینگ بو سفردهگی اونملی هدفلریدن بولگن.
عینحالده، سیاسی و حربی بیلرمانلردن قطاری، آمریکه مدافعه وزیرینینگ کابل ده قیلگن سفری نی نتیجهسی توغریسیده شک بیلدیریب ایتیشلریچه، افغانستاننینگ طالبلربیلن تینچلیک پروسهسیده تنیقلیک موجود بولیب و منطقه مملکتلری اونینگ اوستیگه توافق بیلدیرگن صورت ده بو سفرلر نتیجه بیریشی ممکن.
حربی ایش بیلرمان جاوید کوهستانینینگ ایتیشیچه، گرچند آمریکه رسمیلری افغانستان تینچلیگی توغریسیده منطقه ده واحد فکر بولیشی خصوصیده سعی و حرکت قیله دی، بیراق اونینگ عملی نتیجهسی مملکتده اوروش، ترورچیلیک هجوم لر و یشاوچیلرنینگ هلاک بولیشی رقمی قویی کیلگن زمان ده کورینه دی. کوهستانی جنابلری گه کوره، متیس جنابلرینینگ حاضرگی وضعیت ده قیلگن سفری، کابل و واشنگتن آرهسیده یالغیز رسمی سوزلشوو صفتیده قالیشی ممکن.
سیاسی ایش بیلرمان اسحاق اتمر، متیس جنابلرینینگ کابل ده قیلگن سفری دن اونملی هدف منطقوی بیر اجماع قوریلیشی دیر. بیراق اونینگ ایتیشیچه، بو هدف نتیجه بیرمهی و منطقه ده قرمه قرشیلیکلر کوپهیگن صورتده، افغانستان اوروشی نی یکونلنیشی گه تینچلیک پروسهسینینگ تاثیری کم بولهدی.
بو توغریده جمهورلیک ریاستینینگ فکرینی اورگنیش ایستهدیک، بیراق کوپنیچه سعی و حرکتلر بیلن موفق بولمهدیک.
آمریکه مدافعه وزیری کابل ده سفر قیلمسدن آلدین آمریکه تشقی ایشلر وزیری مایک پومپئو پاکستان ده باریب و مذکور مملکتنینگ بلند مرتبهلی رسمیلری بیلن اوچرهب و سوزلشوو اوتکزگن ایدی.
افغانستاننینگ ایریم بولیملریده ترورچیلیک حادثه کوپهیگن بیر چاغده، بو سفر صورت تاپهدی.
