د سوداګرۍ او صنایعو خونې مسوولانو نن چین ته د حیرتان بندر د اوسپنې پټلۍ له لارې د افغاني توکیو د لېږد لړۍ د پیل خبر ورکړ.
د افغانستان د سوداګرۍ او صنایعو خونې مرستیال خانجان الکوزی وايي، د یادې پټلۍ په پرانستې سره به د چیني توکیو د واګونونو د لېږد په بیو کې ۵۰ سلنه کموالی راشي او دغه راز به چین ته د افغانستان د ټولو معدني صادراتي توکیو د لېږد اسانتیاوې برابرې شي.
د الکوزي په وینا، اوس هم د صادراتو په برخه کې امنیتي او د فساد ستونزې پر ځای پاتې دي او باید د لرې کولو لپاره یې اقدام وشي.
الکوزی زیاتوي، هڅه کېږي چې په راتلونکي کال کې د افغانستان صادرات ۲ میلیارډه امریکايي ډالرو ته لوړ شي.
د سوداګرۍ او صنایعو خونې مرستیال همدارنګه وايي، له څو ورځو راهیسې د حیرتان بندر د ځینو کړیو له لوري تړل شوی او دغه کسان هڅه کوي چې د سوداګرۍ په برخه کې د افغانستان د لاستهراوړنو په وړاندې خنډ جوړ کړي.
د افغانستان ـ چین سوداگریز هوایي دهلېز پرانستل شو
په افغانستان کې د چین سفارت چارواکي بیا د افغانستان د صادراتي توکیو د کیفیت سنجولو لپاره د یوه میکانېزم پر جوړولو ټینګار کوي.
ټاکل شوې له دې وروسته د واخان کورېدور خصوصي شرکت او یو شمېر نور چیني شرکتونه د حیرتان بندر له لارې د اوسپنې پټلۍ په وسیله چین ته د افغانستان سوداګریز توکي صادر کړي.
