بدخشان ولایتی کینگش اعضالریدن بیرقطاری و واخان تومنی یشاوچی‌لری، بو تومن مکتب‌لریدن بیرقطاری یاپیق قالگنیدن خبر بیرگنلر.
اولرنینگ ایتیشیچه، پامیرده ینگی تعلیمی ییل باشلنگنی‌دن 2 آی اوتماقده، بیراق حاضرده بو بولیم‌ده قطار مکتب‌لر آچیلگن ایمس.
هوا ساووق‌لیگی سبب، هرییل واخان تومنی نینگ پامیرلر منطقه‌سیده تعلیمی ییل جوزا آی ده باشلنه‌دی.
بدخشان ولایتی کینگش اعضاسی طلبالدین قادری نینگ سلام‌وطندارگه ایتیشیچه، پامیرلرده معارف مدیریتی نینگ قطار بولیم‌لریده فساد بولگنی سبب، مکتب‌لر یاپیق قالگن.
پامیر یشاوچی‌لریدن بیرقطاری نینگ بو وضعیتدن خواطر بیلدیریب ایتیشیچه، بو منطقه‌لرنینگ مکتب‌لری تیزلیک‌که آچیلمه‌گن صورتده، خزان موسومی ایتیب کیلیشی بیلن هوا ساووق بوله‌دی و اوقووچی‌لر تعلیم کورشدن محروم قاله‌دیلر.
بیراق، بدخشان معارف ریاستی مسووللری نینگ ایتیشیچه، اوقیتووچی‌لرنینگ حقوقلری کم بولگنی سبب، مذکور مکتب‌لر یاپیق قالگن.
بدخشان معارف ریاستی باشلیغی سمیع ابدیار نینگ ایتیشیچه، اوقیتووچی‌لر کم حقوق بیلن پامیرلرده باریش‌گه حاضر بولمه‌یدی، بو قیین‌چیلیک‌نی معارف وزیرلیگی بیلن شریک قیلگنلر.
پامیرلر یشاوچی‌لری، قتناو یول خصوصیده بولگن قیین‌چیلیک‌لر سبب، 10 ییل آلدین تعلیمی خذمت‌لردن محروم ایدی، بیراق 1388- ییلده بو منطقه‌ده اوقیتووچی‌لر و اوقووچی‌لرگه لیلیه ایجاد ایتیلیب و تعلیمات زمینه‌سی یره‌تیلدی.
