قطر باشکینتی دوحه ده افغانستان تینچلیک لایحه‌سی بوییچه آمریکانی خاص نماینده‌سی زلمی خلیلزاد و طالبان گروهی نینگ نماینده‌لری آره‌سیده تینچلیک سوزلشوولرینی آلتینچی دوری دوام ایتماقده.
طالبان گروهی سابق اعضالریدن بیرقطاری نینگ ایتیشیچه، قطر ییغینیده زلمی خلیلزاد و طالبان گروهی نینگ نماینده‌لری آره‌سیده افغانستاندن چیت‌ایللیک کوچلرنینگ چیقیش جدولی اوستیگه بحث قیلینیشی گه علاوه، تینچلیک شرطنامه‌سیده اسلامی امارت آتی کیریتیلیشی، ترورچیلیک‌که قرشی کوره‌ش و افغانستانده داعش حضوری توغریسیده بحث قیلینه‌دی.
طالبان گروهی سابق رسمی‌لریدن بیری وحید مژده نینگ سلام‌وطندارگه ایتیشیچه، اوشبو دور سوزلشوولرده اینگ جنجل‌لی موضوعلردن بیری تینچلیک شرطنامه‌سیده اسلامی امارت آتی کیریتیلیشی دیر.
جناب مژده گه کوره، افغانستانلیک‌لر ارا تینچلیک سوزلشوولرده اسلامی امارت تعریفی و امارت مقصدی اوستیگه کوپراق بحث قیلینه‌دی.
مژده نینگ کوپه‌یتیریشیچه، طالبان گروهی چیت‌ایللیک کوچلر افغانستان توپراغیدن 6-9 آی جریانیده چیقیشی نی ایسته‌گن، بیراق امریکا بونچه زمان ییترلی ایمس دییدی.
طالبان گروهی نینگ اوشبو سابق ملازمی گه کوره، تینچلیک سوزلشوولرینی آلتینچی دوری ایلگری ییغینلردن کوره ایجابی بولیشی کوتیله‌دی.
طالبان گروهی نینگ سابق اعضالریدن باشقه بیری سیداکبر آغانینگ ایتیشیچه، قطرده طالبان گروهی نینگ نماینده‌لری و زلمی خلیلزاد آره‌سیده بولگن آلتینچی دور تینچلیک سوزلشوولریده یخشی یوتوقلر یوز بیرگن.
جناب اکبرآغاگه کوره، طالبان گروهی افغانستاندن چیت‌ایللیک کوچلر چیقیش مسئله‌سی و افغانستان ینه‌ده ترورچی‌لرنینگ باش‌پناهی گه اوزگرمه‌سی خصوصیده بیریله‌دیگن ضمانت نهایی بولمه‌گونگه‌قدر باشقه بحث گه کیرمه‌سی اوستیگه تأکید قیلگن.
طالبان گروهی نینگ اوشبو سابق ملازمی نینگ کوپه‌یتیریشیچه، بو سوزلشوولر 2- روزه گچه دوام ایتیشی ممکن.
سلام‌وطندارگه صحبت بیرگن تینچلیک عالی کینگشی سوزلاوچیسینی اورین باسری اسدالله زایری نینگ ایتیشیچه، بو دور سوزلشوولرده افغانستاندن چیت‌ایللیک کوچلر چیقیشی، طالبان گروهی نینگ علاقه‌سی ترورچی گروهلر بیلن کیسیلیشی، آتیش‌کیسین اعلان ایتیلیشی و افغانستانلیک‌لر ارا تینچلیک سوزلشوولری یولگه قوییلیشی خصوصیده بحث قیلینه‌دی.
افغانستان تینچلیک لایحه‌سی بوییچه آمریکانی خاص نماینده‌سی زلمی خلیلزاد و طالبان گروهی نینگ نماینده‌لری آره‌سیده یولگه قوییلگن آلتینچی دور تینچلیک سوزلشوولری اوتگن هفته چهارشنبه کون دوحه ده باشلندی و حاضرگچه یکونله‌نیش زمانی بیللی بولمه‌گن.
