طالبلر گروهی‌نینگ بهاری عملیاتی نیچه ولایت اوستیگه جدی هجوم بیلن باشلندی. ایکی کوندن بویان قندز، پکتیا، زابل، سرپل، بادغیس و بدخشان ولایتی طالبلرنینگ کینگ هجومی گه گواه بولگن.
بیراق مذکور ولایتلرنینگ محلی رسمی‌لری تامانیدن بیریلگن دستلبکی ارقام‌لرنینگ کورستیشیچه، طالبلر آغیر تلفات کورگن.
محلی رسمی‌لرنینگ ادعالری اساسیده، ایکی کوندن بویان دوام ایتیب کیله‌دیگن آتیشمه‌لرده طالبلر جنگری‌لریدن 45 ته‌سی هلاک و 44 دن آرتیق جنگریسی تن جراحتی کوتارگن.
سلام‌وطندارگه صحبت بیرگن بدخشان حاکمی سوزلاوچیسی نیک‌محمد نظری نینگ ایتیشیچه، طالبان ایکی کوندن بویان جرم، زیباک و راغستان تومن‌لریده کینگ هجوم یولگه قویگنلر کیم امنیتی کوچلر تامانیدن آرقه گه اوریلگن.
اونگه کوره، اوشبو آتیشمه‌لرده 16 طالب هلاک و باشقه 14 طالب تن جراحتی کوتارگن.
شونینگدیک سرپل حاکمی عبدالقادر آشنا نینگ ایتیشیچه، اوتگن کیچه طالبلرنینگ صیاد تومنی اوستیگه اویوشتیرگن هجومی امنیتی کوچلری نینگ قرشی هجومی گه دوچ کیلیب مغلوب بولگن.
سرپل حاکمی گه کوره، مذکور نیچه ساعتلیک آتیشمه نتیجه‌سیده، طالبلرنینگ 3 کلیدی قومندانی شامل 12 جنگریسی هلاک و باشقه 6 طالب یره‌لنگن.
شو توغریده:
- طالبان گروهی‌نینگ بهاری عملیاتی باشلندی
آمریکا و افغانستان تامانیدن طالبان گروهی نینگ بهاری عملیاتی قاره‌لندی
طالبان گروهی نینگ بهاری عملیاتی باشلندی؛ آتیشمه‌لر شدتلنگن
شونینگدیک طالبلر بهاری عملیات‌لری باشلنگنی بیلن پکتیا، بادغیس، زابل و کندز ولایتلری نینگ قطاری تومن‌لریگه هجوم قیلگنلر کیم مذکور ولایتلر محلی مسئولریگه کوره، هجوم‌لرنینگ برچه‌سی آرقه گه اوریلگن.
سلام‌وطندار بیلن صحبت اوتکزگن قندز پولیس قومندانلیگی سوزلاوچیسی انعام‌الدین رحمانی نینگ ایتیشیچه، طالبلر قندز ولایتی نینگ قطار منطقه‌لریده هجوم قیلگن و نتیجه‌ده 15 طالب و 10 عسکر هلاک و شونینگدیک 20 طالب تن جراحتی کوتارگن.
عین حالده، طالبان سوزلاوچیسی ذبیح‌الله مجاهد اوشبو گروه جنگریلری گه ییتیشگن تلفات ادعاسینی رد قیلیب ایتیشیچه، طالبلرنینگ امنیتی کوچلرگه قرشی اوروشی نی دوامی بار.
