فراه ولایتی کینگش اعضالریدن بیرقطارینینگ سلام‌وطندارگه ایتیشیچه، قورالی طالب‌لر اوتگن کیچه فراه شهرینینگ قطار بولیم‌لری و اوشبو ولایت بالابلوک و پشتکوه تومنی‌ده هجوم قیلگن‌لر.
فراه ولایتی کینگش اورین باسری شاه‌محمود نعیمی‌نینگ ایتیشیچه، قورالی طالب‌لر بالابلوک تومنی‌نینگ آب‌خرمای منطقه‌سیده بولگن ملی اوردو و ملی پولیس قوشنی مرکزی اوستیگه هجوم قیلیب نتیجه‌ده ملی اوردو و ملی پولیس کوچ‌لریدن کمیده 30 ته‌سی هلاک ایتیلگن. جناب نعیمی‌گه کوره، اوشبو گروهنینگ باشقه منطقه‌ده‌گی هجوم‌لری نتیجه‌سیده هم امنیتی کوچ‌لردن بیرقطاری هلاک ایتیلگن، بیراق بیللی ارقام قولگه یوق.
فراه ولایتی کینگش اعضاسی خیرمحمد نورزایی‌نینگ ایتیشیچه، طالب‌لر تامانیدن آب‌خرمای منطقه‌ده یولگه قویلگن هجوم نتیجه‌سیده، امنیتی کوچ‌لردن بیرقطاری تلفات کورگن، بیراق بیللی ارقام قولگه یوق. اونینگ ایتیشیچه، ملی اوردو و ملی پولیس کوچ‌لریدن 45 ته‌سی مذکور مرکزگه جای‌لشتیریلگن ایکن.
فراه پولیس قومندانلیگی‌نینگ سوزلاوچیسی محب‌الله محب‌نینگ طالب‌لر هجوم‌لرینی تصدیق‌لب ایتیشیچه، حاضرگه‌قدر تلفات ارقامی بیللی ایمس. جناب محب‌نینگ ایتیشیچه، مذکور هجوم‌لرده قورالی طالب‌لردن هم بیرقطاری هلاک ایتیلگن، بیراق ارقامی بیللی ایمس.
عینحالده، طالب‌لر سوزلاوچیسی قاری‌یوسف احمدی‌نینگ ایتیشیچه، اوتگن کیچه ساعت 11 اطرافیده، اوشبو گروه جنگره‌لری، ملی پولیس و ملی اوردو قوشنی مرکزیگه کیریب امنیتی کوچ‌لردن کمیده 30 ته‌سی‌نی اولدیرگن‌لر.
