.jpg)
سونگی کونلرده باشکینتنینگ هر بیر چیککهسیده کابل شهردارلیگینینگ بیلگیلری و تبلیغ برگهلری کوزگه کورینهدی. اوشبو بیلگیلرده یشاوچیلر فکرلری، تکلیفلری، قیینچیلیکلری و ییچیم یوللر اوچون «155» رقمیگه قونغیراق قیلیب باشکینت شهردارلیگینینگ مسؤوللری بیلن ایرکین شکلده صحبت قیلیشلری ایتیلگن.
بوندن آلدین، قیینچیلیکلرنی مسؤوللر بیلن شریک قیلیشده ساعتلر اوتردی و کوپ خرجت بیلن اوچرهشیشگه وقت آلینگن صورتده، مقصدگه ایریشیش امکانی بار ایدی.
بوگون بیر تورت یول چیککهسیده تیکیلگن شهردارلیک مسؤوللری بیلن ایرکین علاقه قوریش بیلگیلنگن کته بیر تبلیغ برگهنی یانیدن اوتهیاتگن چاغیمده اسد بیلن اوچرهشدیم. بو یاش کابل بیلیم یورتی اقتصاد بولیمی اوقووچیسی دیر. اونینگ ایتیشیچه، اوتگن نیچه ییلده بو شهردارلیکنینگ بیرینچی یخشی ایشی بولگن. اونگه کوره، اوتمیشلرده قیینچیلیکلرنی مسؤوللرگه ییتکیزیش جوده قیین ایدی، بیراق حاضر مملکتنینگ هر چیککهسیدن توریب مسؤوللر بیلن علاقه قوریب و اولر بیلن ایرکین شکلده سوزلهشیب بولهدی.
شو پیتگچه اوشبو رقم گه قونغیراق قیلیب و بیران قیینچیلیکنی شهردارلیک مسؤوللریگه ییتکیزدینگ می؟ دیگن سوراق جوابیگه اسدنینگ ایتیشیچه، حاضرگهقدر ایرکین و پولسیز شکلده شهردارلیک مسؤوللری بیلن علاقه قوریشدن خبرسیز ایکن و بوندن سونگ، نیاز بولگن صورتده، اوشبو رقم آرقهلی مسؤوللر بیلن شریک قیلهدی.
اسد استعدادلی یاش دیر. دستلب سوزگه باشلهگنیدن بونی سیزدیم. اونینگ ایتیشیچه، باشکینت اوچون برنامه و ریجهلری بار و اونی شهردارلیک مسؤوللریگه ییتکزیشنی ایستهیدی.
.jpg)
اسد ایسه مینینگ اورتاغی امینگه تانیشتیردی. امیننینگ ایتیشیچه، ساووق موسومده شهر قیینچیلیگی ایلگریدن کوره کوپ بولهدی، باشکینتنینگ کوچه و پس کوچهلری سوو حوزی گه اوزگرهدی و لای موجودلیگی کلیب و کیتیشنی یشاوچیلرگه قیین قیلهدی. اونگه کوره، قیینچیلیکلرنی آز مدت و قولیلیکده مسؤوللرگه ییتیشتیریشیدن خرسند دیر. ایتیشیچه، نیچه مرته تورلی قیینچیلیکلرگه روپهره بولگن و اونی شهردارلیککه ییتکزیشنی ایستهگن، بیراق ییتکزیش قیین بولگنی باعث، اوندن وازکیچگن.
بیراق، بو آرهده مینینگ اویگچه ییتکیزگن هیداوچی رفیعالله، تجربهسیدن یخشی حکایه قیلدی. اونینگ ایتیشیچه، کونلردن بیر کون باشکینتنینگ نادرپشتون جادهسینینگ ایکی تامانیدن موترلر پارک ایتیلگنی باعث، جدی گاوجوملیک ایجاد بولگن. ایتیشیچه، ایکی ساعتدن آرتیقراق بو گاوجوملیک آرهسیده قالهدی و نتیجهده کوزی کابل شهردارلیگینینگ بیلگیسی گه توشهدی: «تیزلیکده 155 رقمی گه قونغیراق قیلیب و قیینچیلیکنی مسؤوللر بیلن شریک قیلدیم. مسؤوللر منطقهنینگ دقیق آدرسینی سورهدی، بیرینچیدن وقتیمنی بیجا اوتکزگنیمنی سیزدیم، بیراق نیچه دقیقهدن سونگ، بیرقطار پولیس منطقه گه ییتیشدی و قیینچیلیکنی حل قیلدی.» رفیعالله نینگ ایتیشیچه، بیرینچی مرته مسؤوللر تیزلیک بیلن شکایتینی ایشیتگن.
عین حالده، بیرقطارلر بوندهی رقم بولگنیدن خبر سیز ایکن و بو توغریده اولرگه معلومات بیرگنیمده برچه اوشبو موضوع توغریسیده خبر بیریش اوچون شهردارلیکنی دقتسیزلیککه عیبلهدیلر.
.jpg)
بو سوزلشوولر سبب، باشکینت شهردارلیگینینگ سوزلاوچیسینی ایزلهدیم. عبدالجلیل سلطانینینگ ایتیشیچه، شهردارلیک ایشلاوچیلری میزلرینی آرقهسیده یشاوچیلرنینگ قیینچیلیکلریگه تینگلشنی کوتهدیلر. سلطانی گه کوره، مسؤوللر شکایت قولگه کیریتگنده، اونگه ییچیم یول تاپهدی و تیزلیکده شهردارلیک تیمی منطقه گه یوباریلهدی.
شهردارلیک سوزلاوچیسینینگ ایتیشیچه، افغانستان یشاوچیلری هر زمان و هر ییردن 155 رقمی گه قونغیراق قیله آلهدیلر. اونگه کوره، یشاوچیلرنینگ قیینچیلیکلرینی حل قیلیش اوچون کته بیر تیم تعیین ایتیلگن و اولر کابل شهردارلیگینینگ ایشلری یخشی بولیشی اوچون هیچ قندهی سعی و حرکتدن وازکیچمهیدیلر.
یشاوچیلرنینگ شکایتیگه تینگلنگنیدن سونگ، شهردارلیک مسؤوللری قیتهدن قیینچیلیکنی شریک قیلگن یشاوچیگه قونغیراق قیلیب و قیینچیلیک حل ایتیلگنیدن ایشانچ قولگه کیریتهدیلر.
کابل شهری دنیاده اونلرچه قیینچیلیککه روپهره بولیب تورگن باشکینتلردن بیری سنلهدی. کابل شهردارلیگی قویاش 1298- ییل امانالله خان شاهلیگیده بلدیه ادارهسی نامیده ایجاد ایتیلدی. محمدنادر خاننینگ حاکمیتیده شهری لایحه رواجلندی و محمدظاهرشاهنینگ سلطنت دوری ده بیرینچی مرته شهری تیزیمنامه ریجهلندی و قویاش 1320- ییل بلدیه آتی اورنیده شهردارلیک آتی رویخطگه آلیندی.
