خوست کې ځانمرګي برید ۲۷ سرتېري وژلي او ۷۹ یې ټپیان کړي

پرون د خوست نادرشاه‌کوټ ولسوالي کې د ملي‌اردو لومړۍ پلې لوا جامع جومات کې د جمعې د لمانځه پرمهال د ځانمرګي برید په پایله کې د ملي‌اردو ۲۷ سرتېري او افسران ووژل او ۷۹ نور یې ټپیان کړل.

که څه هم په لومړنیو معلوماتو کې د خوست والي ویلي وو چې په‌دې ځانمرګي برید کې د ملي‌اردو ۱۲ سرتېري وژل شوي او ۳۳ ټپیان دي او د ملي اردو د لومړۍ پلې لواء ویاند تورن عبدالله ۹ وژل شوي او ۲۲ ټپیان ښودل؛ خو وروسته یوې دولتي سرچینې د نوم نه ښودلو په شرط سلام وطندار ته وویل چې پرونۍ پېښې کې د ملي‌اردو ۲۷ سرتېري او افسران وژل شوي او ۷۹ ټپیان دي.

له‌دې مخکې د خوست د عامې‌روغتیا رییس تایید کړې‌وه چې د ملي‌اردو ۴۴ ټپیان د دې ولایت حوزوي روغتون ته وروړل شوي او ۳۵ نور د خوست ښار خصوصي روغتونونو ته لېږدول شوي او د ځېنو ټپیانو روغتیایي حالت یې نازک ښودلی و.

د دې تر څنګ یو شمېر ټپیان د درملنې په پار په چورلکو کې کابل ته انتقال شوي.

د سیاسي شنونکو تر څنګ عام خلک هم اندېښمن دي چې څنګه داسې خوندي ځای ته ـ چې څو ځایه تلاشي او پوښتنې کېږي ـ بیا هم ځانمرګی بربدګر ننوتلی شي.

چارواکي وایي، تراوسه نه‌ده معلومه چې ځانمرګی له کومې لارې لومړۍ لوا او بیا جومات ته داخل شوی.

تراوسه رسنیو ته د دې پېښې پړه کومې وسله واله ډلې هم په غاړه نۀ ده اخیستې.

خوست کې د ملي‌اردو لومړۍ پلې لوا د ښایسته لوا په نوم هم یادېږي او هره جمعه په‌کې شاوخوا شپږنیم‌سوه سرتېري او افسران د جمعې لمونځ ادا کوي.