وسلهوالو نن سهار شاوخوا اووه نیمې بجې د کابل ښار د لومړۍ امنیتي حوزې په اړوند شوربازار سیمه کې د سیکانو پر یوه درمسال برید وکړ.
کورنیو چارو وزارت د یوې خبرپاڼې په خپرولو سره وايي، په یاد برید کې ۲۵ ملکیان وژل شوي او ۸ نور ټپیان دي.
کورنیو چارو وزارت زیاتوي، یوه وسلهوال د سیکانو پر یاد عبادتځای برید وکړ چې امنیتي ځواکونه ژر سیمې ته ورسېدل، یو وسلهوال یې وواژه او ۸۰ ملکیان چې ښځې او ماشومان هم پهکې وو، وژغورل.
د ملي امنیت شورا سلاکار حمدالله محب، پخواني ولسمشر حامد کرزي او یوشمېر نورو چارواکیو پر سیکانو برید غندلی او هغه یې ستر جنایت بللی دی.
سپېدار ماڼۍ هم د یوې خبرپاڼې په خپرولو سره پر سیکانو برید د بشرضد جنایت بللی او دا یې په هېواد کې د مذهبي او ټولنیزو کړکېچونو د جوړولو لپاره یوه هڅه بللې ده.
د هند د بهرنیو چارو وزارت هم په کابل کې د سیکانو پر درمسال برید په سختو ټکو غندلی او دا یې د هغوی د مذهبي مراسمو د پیکه کولو لپاره یوه هڅه بللې ده.
په کابل کې د امریکا سفارت هم د یاد برید د غندلو ترڅنګ ویلي، په افغانستان کې به هغه مهال سوله راشي چې خلک یې د وسلې پر ځای، د خبرو له لارې خپل اختلافونه حل کړي.
د بښنې نړیوال سازمان هم په کابل کې د سیکانو پر درمسال برید ټکان ورکوونکی یاد کړی او زیاته کړې یې ده چې امنیتي ځواکونه د لږکیو د مذهبي مراسمو او عبادتځایونو د ساتلو مسوولیت لري.
دغه سازمان غوښتنه کړې چې د یاد برید عاملانو ته باید په یوه عادلانه محکمه کې سزا ورکړل شي.
په کابل کې د پاکستان سفارت هم دغه برید غندلی او هغه یې ترهګریز عمل بللی دی.
د بشري حقونو خپلواک کمېسیون هم پر سیکانو نننی برید غندلی او په هېواد کې پر مذهبي لږکیو د دا ډول سیستماتیکو بریدونو دوام د اندېښنې وړ ګڼلي دي.
یاد کمېسیون له افغان دولت نه غوښتي چې د مذهبي لږکیو د امنیت ټینګښت او د هغوی د حقونو ساتلو لپاره لازم اقدامات وکړي.
دغه برید پر ټولنیزو رسنیو هم پراخ غبرګونونه راپارولي او دا یې په هېواد کې د لږکیو پر وړاندې یو نه بښونکی تېری بللی دی.
وسلهوالو طالبانو ویلي چې په یاد برید کې لاس نه لري، خو داعش ډلې یې بیا مسوولیت منلی دی.
