د هرات ولایت سيمه ییز چارواکي وايي، چې د یاد ولایت په شينډنډ ولسوالۍ کې د ملاصمد او ملا ننګيالي په نومونو د دوو طالب قومندانانو ترمنځ د اختلافاتو له وجې وسله واله نښته رامنځ ته شوې.
د هرات د والي ویاند احسان الله حیات سلام وطندار ته وویل، چې د دغو دوو طالب قومندانانو او پلويانو ترمنځ نښته نن سهار (دوشنبه ډسمبر ۷مه) د "زیرکوه" په کلي کې رامنځ ته شوې، چې اوس هم دوام لري.
حیات الله زیاتوي، چې تر اوسه د دغې وسله والې نښتې له امله د ملاصمد ۶ تنه او د ملا ننګيالي له ډلې ۵ تنه وژل شوي او د دواړو خواوو څخه بیا ۱۰ تنه ټپيان شوي دي.
یوې امنيتي سرچينې، چې له نوم اخیستو يې ډډه کړې سلام وطندار ته وویل، چې په یاده نښته کې د وسله والو طالبانو له لوري نومول شوی ولسوال ملاصمد وژل شوی دی.
د راپورونو پر بنسټ په دې وروستيو کې د وسله والو طالبانو ترمنځ نښتې زياتې شوي.
تېره اوونۍ د پاکستان په کويټه ښار کې د طالبانو خپلمنځي نښتې له امله د دغې ډلې نوی نومول شوی رهبر ملا اخترمحمدمنصور ټپي شو، چې وروسته بیا د مرګ راپورونه يې خپاره شول، خو د طالبانو له لوري تېره ورځ د ملامنصور په نوم يو غږيز پېغام خپور شو، چې ګوندې دا ملا منصور دی.
د هرات د والي ویاند وايي، چې د ملا اختر محمد منصور د ټپي کېدو د خبر څخه وروسته د وسله والو طالبانو ترمنځ قوي اختلافات رامنځ ته شوي.
په دې اړه تر اوسه وسله والو طالبانو له لوري څه نه دي ویلي.
