د افغانستان د سوداګرۍ او صنایعو خونې چارواکي سلاموطندار ته وايي، د سږ کال په لومړیو نهو میاشتو کې پاکستان، هند، چین، قزاقستان، ایران، روسیې، المان او اروپا ته د ۱۰۰ میلیونو ډالرو په ارزښت له ۱۴۴زره ټنه زیاته ترکاري صادر شوېده.
پیاز، کچالو، ګُلپيان، روميان، ګازرې، دڼیا، هوږه او بادرنګ له هغو ترکاریو دي چې له هېواده بهر د نورو هغو په پرتله زیاتې صادریږي.
د سوداګرۍ او صنایعو خونې مرستیال خانجان الکوزی وايي، لهدې ډلې ۱۱۷زره ټنه یې یوازې پاکستان ته صادر شويدي.
ښاغلی الکوزی پاکستان ته د ترکاریو د صادراتو لوړه کچه، د افغانستان محصولاتو سره د پاکستانیانو ښه لېوالتیا او مناسب بازار بولي.
د ممیزو، میوو او سبزیو د صادراتو پرمختیا ادارې مشر سیدعظیم مصطفی هاشمي وايي، له هېواده بهر ته د صادرو شویو ۱۴۴زره ټنو ترکاریو له ډلې، یوازې ۷زره ټنه یې د دې ادارې له لوري د کیفیت د تثبیتلیک په درلودلو سره صادر شويدي.
ښاغلی هاشمي زیاتوي، د تېر لمریز کال ۹ میاشتو کې د کیفیت تثبیتلیک په لرلو سره د افغانستان د ترکاریو د صادراتو کچه ۱۳زره ټنو ته رسېده.
خو د سوداګرۍ او صنایعو خونې مرستیال خانجان الکوزی په ټینګار سره وايي چې د کیفیت جواز د لرلو ترڅنګ سوداګر کولی شي د ترکاریو د صادراتي توکیو د مبدا تصدیقلیک د پاڼې په ترلاسه کولو چې د هر هېواد د حاصلاتو مبدا ښيي او د کرنې او اوبو لګونې وزارت د قرنطین پاڼې سره هم صادر کړي.
