.jpg)
د کندهار ښاروالۍ ویاند زمري څرګند سلاموطندار ته وویل، د هرات له خوا دغه ولایت سره د لس ټنه انګورو ډالۍ هرکلی کوي او دغه ډول ډالۍ به هراتیان او کندهاریان سره نږدې کړي.
څرګند وايي، د دواړو ولایتونو د ښاروالیانو ترمنځ دغسې یو تړون تېرکال په همدې موخه لاسلیک شوی و.
نوموړی، له هراتیانو ډېره مننه کوي چې په دوستۍ کې يې ګام وړاندې کړ.
په ورته وخت کې د کندهار والي حیات الله حیات د هرات د خلکو له ډالۍ د هرکلي ترڅنګ هراتیانو سره ژمنه کړې چې د کندهار انارو ته په تمه اوسي.
د هرات والي سید وحید قتالي هم نن هرات کې له خبریالانو سره د خبرو پرمهال یادونه وکړه چې دغه انګور يې د «خورلڼۍ» په نامه د ښو اړیکو د ټینګښت په موخه کندهار ته لېږلي دي..jpg)
د قتالي په وينا، دغه لس ټنه انګور د هرات د بڼوالو ټولنې او کرنې ریاست له لوري د ښاروالۍ په همکارۍ کندهار ته ولېږل شول.
د هرات والي زیاته کړه چې دغسې دوستانه ډالۍ به لا هم د کندهار او هرات ولایتونو ترمنځ د «خورلڼۍ» لړۍ چټکه کړي چې له دې لارې به د دواړو ولایتونو ترمنځ سوداګریزه، کرنیزه او اقتصادي همکاري لا وغوړېږي.
د کندهار یو شمېر اوسېدونکي چې دغه انګور يې ترلاسه کړي، خوشحاله دي او غواړي چې دغه لړۍ نوره هم وغځېږي، ترڅو نه یوازې د هرات کندهار، بلکې د نورو ولایتونو ترمنځ هم دغسې راکړه ورکړه دود او افغانان په خپلو منځو کې نور هم سره نږدې کړي.
کندهار او هرات د هېواد په کچه دوه مهم ولایتونه دي او د دوی ترمنځ د ښو اړیکو ټینګښت د هېواد پر اقتصادي، کرنیزه او ان سیاسي اوضاع ښه اغېز کوي.
