جمهور رییسنینگ حکومت ایشلریگه اصلاحات کیریتیش و یخشی حکومتدارلیک بوییچه مخصوص نمایندهسی احمدضیا مسعودنینگ مملکت شمالی و شمالشرق جهادی قومندانلریگه خطاب ایتیشیچه، تینچلیک لایحهسیگه الدهنمهی، منطقهلریدن دفاع قیلیش اوچون تیارگرلیک آلیشلری لازم.
اوتگن (دوشنبه کون) تخار مرکزی تالقان شهریده جهادی قومندانلر حضوریده سوزگه چیقگن ضیا مسعودنینگ آگاهلنتیریشیچه، قوراللی طالبلر کیلهجک ییل کوکلم موسومیده قندوز، تخار و بدخشان ولایتلرینی نظارتگه آلیش اوچون هجوملرینی کینگهیتیرهدی و اولردن اوشبو گروهگه قرشی اوروشیش اوچون تیارگرلیک آلیشلرینی سورهدی.
مسعودنینگ ایتیشیچه، مجاهدلر بیلن محلی قومندانلر، کیلهجک اوروش اوچون تیارگرلیک آلمهگن صورتده، شمالشرق ولایتلری قوراللی طالبلر قولیگه سقوط قیلیشی ممکن.
جمهور رییس خاص نمایندهسینینگ ایتیشیچه، تینچلیک لایحهسی ینگی باشلنگن و دواملی بولهدی. اونگه کوره، افغانستان ایشیگه ارهلشهدیگن مملکتلرنینگ «منفعتی تروریستی گروهلر تامانیدن تأمینلنمسه، تینچلیک لایحه نتیجه بیرمهیدی».
قویاش جاری ییل جریانیده شمال و شمالشرقده قوراللی طالبلر فعالیتی کینگهییب و نفوذی هم کونسایین کوپیماقده. اوشبو گروه کمیده بیش آی آلدین بیر کینگ هجوم اویوشتیریب قندوز ولایتینینگ ادارهسینی اون کونگچه نظارتگه آلدی.
محلی قومندانلرنینگ ایتیشیچه، قوراللی طالبلر حاضر قندوز، تخار و بدخشان ولایتلرینینگ کینگ قسمتلرینی نظارتگه آلگن و کوکلم موسومیده قانلی اوروش باشلهشی خصوصیده تیارگرلیک آلهدی.
سابق جهادی قومندانلر، قندوز ولایتی قوراللی طالبلر قولیگه سقوط قیلگنیدن کیین، خلق کوچلری آتیده قوراللی گروهلرینی قیتهدن فعال قیلدیلر.
انچه پیت آلدین تخار حاکمی، ناقانونی قوراللی گروهلر طالبلردن یمان دیگن ایدی.
تخار محلی کوچلی قومندانلریدن بیری «آمر پیرمقل» اوشبو ییغینده اشتراک ایتیب مرکزی حکومت رسمیلریگه خطاب ایتیشیچه، اونگه حق بیریلمهگن صورتده، نظام و طالبلرگه قرشی اوروشهدی.
گزارشلر اساسیده، اوشبو محلی قومنداننینگ بیرمینگ قوراللی نفری بار و بویروغیده بولگن کیشیلر تخار ولایتینینگ رستاق تومنیده جایلشگن.
