قندوزده امنیتی رسمیلرنینگ ایتیشیچه، امنیتی کوچلر مذکور ولایت قلعهزال تومنینینگ، نیچه کوندن کیین، اوز نظارتلریگه آلگن.
نظم عامه پولیس عمومی قومندانی جنرال زمری پیکاننینگ ایتیشیچه، قلعهزال تومنینی قیته آلیش عملیات (سهشنبه کون) ساعت 11 ده باشلنگن و اوچ ساعتلیک توقنهشوودن کیین، امنیتی کوچلر قولیگه توشگن. اونگه کوره، بو توقنهشووده کمیده 7 جنگری طالب هلاک بولگن.
باشقه تاماندن، حربی کوچلر اورین باسری و قندوز اوروشی قومندانی جنرال مرادعلی مرادنینگ ایتیشیچه، طالبلر بوتونلهی قندوز شهریدن چیقاریلگن و حاضر حربی کوچلر کمربندلرنی مستحکم لشتیرماقده.
جناب مرادنینگ ایتیشیچه، طالبلر باشقه قندوز شهریگه قیتهآلمهیدی. او، قندوز خلقیگه ایشانچ بیریش اوچون، شهر دکانلری و خلقینی کوریب ایتیشیچه، قندوز خلقینینگ امنیتی کوچلرگه ایشانیشلری لازم. جناب مرادگه کوره، قندوز خلقینینگ کته قسمی قیتهدن سوو و برقگه ایگه بولگن.
شونینگدیک جنرال مرادنینگ ایتیشیچه، قندوز ولایتینینگ چهاردره تومنیده حربی کوچلر هوایی عملیاتی باشلنگن. اونینگ کوپهیتیریشیچه، امنیتی کوچلر اوتمیشلردن تجربه آلگن و بوندن کیین، عصیانچیلرگه وقت بیرمهیدی.
قندوز امنیه قومندانلیگی تامانیدن ترقهتیلگن خبرنامهده ایتیلیشیچه، امنیتی کوچلر اوتکن (دوشنبه کیچه) بیر عملیات آرقهلی قندوز- شیرخان بندر قتناو یولینی آچگن و اوشبو یول امنیتی تأمینلنیشی خصوصیده پوسته ایجاد ایتکن.
شونینگدیک، قندوز امنیه قومندانی محمدقسیم جنگل باغنینگ سلاموطندارگه ایتیشیچه، امنیتی کوچلر مذکور ولایت تینچسیز تومنلریگه تامان آلغه بارماقده و حاضر قندوز شهری اوچون هیچ بیر تهدید یوق دیر.
قندوز پولیسینینگ معلوم قیلیشیچه، شهر ایچیدن بوزیلگن حربی و ناحربی نقلیه واسطهلر توپلنماقده و تیزلیکده شهر اوروش نشانهلریدن تازهلنهدی.
شونینگدیک طالبلر تامانیدن ترقهتیلگن خبرنامهده ایتیلیشیچه، مذکور گروه اعضاسی قندوز یشاوچیلرینینگ جانینی سقلش اوچون، اوتکن کیچهدن بویان قندوز شهرینی بوتونلهی ترک ایتکن. اولر قماقخانهدن قوییب یوباریلگن محبوسلر و حربی کوچلردن قولگه کیریتکن حربی جهازلرنی، اوشبو اوروش اونملی یوتوقلریدن دیب بیلهدی.
قندوز شهری کمیده 15 کون آلدین طالبان نظارتیگه اوتگن ایدی.
