د کابل سیند د یوې برخې پاکولو کار پیل شو

د کابل سیند پاکولو په پاره پخوا هم ځېنې هڅې شوې‌وې؛ خو دا ځل یې په بنسټیزه توګه د رغونې او پاکونې چارې پیلېږي.

د پلازمېنې زون پراختیا خپلواکې ادارې کابل کې نن چهارشنبې د ېوې غونډې پرمهال له «ارتل» پُل نه تر عبدالحق څلورلارې پورې د کابل سیند پاکونې او بیارغونې چارې عملاً پیل کړي.

په‌دې اړه جوړې شوې غونډې ته د پلازمېنې زون خپلواکې ادارې مشرالهام عمر هوتک وویل، چې د دایمي اوبو نه‌شتوالی او کثافات د کابل سیند له بنستیزو ستونزو دي او د دایمي اوبو د حل له‌پاره یې باید د شاتوت بند ورغول شي.

هوتک زیاته کړه، چې په دې پروژې ۸۹ میلیونه افغانۍ لګښت راځي، چې کارونه یې عملاٍ پیل شوي. ده ډاډ ورکړ، چې دا پروژه به د کابل سیند د پاکوالي پروسه دایمي کړي.

د ده پر وینا، د پروپوزل له‌مخې به له ارتل پله نه تر عبدالحق څلورلارې پورې شاوخوا ۴۷۰۰ متره مربع سیمه پاکه او ۱۷۰۰۰۰ متر مکعبه اټکل شوي اضافي توکي به ټاکلي ځای ته ولېږدوي.

د پلازمېنې زون پراختیا خپلواکې ادارې مشر همدرانګه وویل، چې د کابل ښار پاکه شوې برخه به د اوبو تر پیدا کېدو پورې اقتصادي فعالیت ته چمتو شي.

ده همداراز وویل، چې له دې سره هم مهاله یو بله پروژه ده، چې د سیند په پاکولو سره به په‌کې مارکېټونه او پارکینګونه هم جوړ شي.

د پلازمېنې زون پراختیایي ادارې د مسوولانو پر وینا، د دې پروژې بشپړېدل به سربیره پردې چې پلازمېنې کې د چاپېریالي ککړتیا ستونزه حل کړي، ترڅنګ یې ځمکې لاندې اوبه ډېرېږي، پانګونې ته خصوصي سکتور هڅول کېږي، د کاري فرصتونه پيدا کول او د ښار په منځ کې د اقتصادي فعالیتونو پراختیا رامنځته کېږي.

د غونډې ګډونوالو د سیمې له خلکو وغوښتل، چې د کابل سیند په پاک ساتلو کې ورسره مرسته وکړي.