د هرات د ولایتي شورا مشر کامران علیزايي نن د یوې خبري ناستي په ترڅ کې حاضر شو، چې د پولیسو غوښتنې ته لبیک ووايي او ځان وسپاري.
نوموړي خبریالانو ته وویل، چې د ده د تسلیمېدو یواځنی علت ولسمشر غني او قانون ته احترام دی.
له بل لوري د هرات د پولیسو ویاند عبدالاحمد وليزاده وویل، چې د هرات امنیې قوماندانۍ ته د کامران علیزايي د نیولو رسمي مکتوب لهمخې نن یکشنبه (اپریل ۱۶مه) ځان د هرات پولیسو ته تسلیم کړ.
خو کامران علیزايي د محکمې لومړی حکم غيرعادلانه وباله او د ده د قضيې په اړه د دویمې او درېيمې محکمې د دایرېدو غوښتونکی شو.
پر ده تور دی، چې څه موده وړاندې يې د هرات له استیناف څارنوالۍ څخه یو مظنون د خپلو ساتونکو په زور له څارنوالۍ ویستی او قانون يې تر پښو لاندې کړی دی.
علیزايي دغه ادعا په کلکه ردوي او ځان د مظلمو خلکو مدافع بولي؛ د محکمې له پریکړې وروسته د پلویانو له خوا يې لاریون هم وشو.
هغه په خپلو تېرو خبرو کې هم ویلي و، چې هیڅکله يې د زور خبره نهده کړې، خو د غریبو خلکو له حقوقو به د ظالم پر وړاندې ټینګ ودريږي.
