د اداري فساد پر وړاندې د مبارزې د نظارت او ارزونې ګډې خپلواکې کمېټې یا مېک د «په کورنیو چارو وزارت کې د اداري فساد د زیانونو د ارزونې» په نوم نن خپل تازه راپور خپور کړ.
د مېک کمېټې مشر باري سلام وویل، د دې څېړنې موخه په کورنیو چارو وزارت کې د تدارکاتو، لوژستیک او د بشري سرچینو د مدیریت په برخه کې د اداري فساد د زیانونو معلومول دي.
د مېک مشر وویل، دا څېړنه ښيي چې د تدارکاتو په برخه کې اوس هم بشپړ معیاري پلان نهشته. هوکړهلیکونه په سمه توګه نه مدیریتېږي او د چارواکیو له لوري د داوطلبيو د جزیاتو د ترلاسه کولو لهپاره فشارونه موجود دي.
ښاغلی سلام د کورنیو چارو وزارت د لوژستیکي جوړښت پېچلتیا د دې وزارت لویه ستونزه په ګوته کړه چې د ناوړه ګټنې موکې برابروي.« د لوژستیک په برخه کې له موټرونو او عرادهجاتو ناوړه ګټنه هم شته، د پارلمان وکیلان، سیاسي څېرې او د پولیسو پخواني افسران د کورنیو چارو وزارت له امکاناتو ګټه اخلي. د بېلګې په توګه، پخوانی وزیر صاحب له غیر اړونده کسانو سره د ۷۰ موټرو موجودیت یادونه کړې وه؛ خو د لوژیستیک ریاست موږ ته یوازې د ۳۶ تنو فهرست را کړ.»
ښاغلی سلام وایي، د دوی څېړنې ښیي چې د کورنیو چارو وزارت بشري سرچینو کی هم ستونزې شته. په وینا یې، ځېنې قوماندانان او چارواکي د پولیسو او د کورنیو چارو وزارت د کارکوونکیو ګومارنه کې مداخله کوي او ګومارنې په رقابتي توګه مخ ته نه ځي.
د اداري فساد پر وړاندې د نظارت او ارزونې کمېټې غړی اجمل شاکر وایي چې ټولو داوطلبانو او شرکتونو ته یو شان معلومات چمتو کول، د کلنۍ ارزونې مکانیزم جوړل او د چارواکیو د ترفیعاتو په اړه د دې کمیټې لهخوا د کورنیو چارو وزارت ته وړاندیزونه وشول.
د کورنیو چارو وزارت کې د پرلیکه سیستم رامنځته کول د موجوده جنسونو له فهرست سره د منظم سیستم رامنځته کول او د کورنیو چارو وزارت په ټولو موټرو کې د جي پي اېس نصبول؛ وزارت ته د مېک له نورو وړاندیزونو دي.
ورته مطالب:
په کورنیو چارو وزارت کې تازه بدلونونه
کورنیوچارو وزارت څه باندې ۷ ملیارده افغانۍ پوروړی دی
د اداري فساد له اړخه د کانونو وزارت زیانمننې په اړه اندېښنې
