ولسمشر محمداشرف غني چې په ارګ کې یې د حضرت محمد ”ص” د میلاد په مناسبت جوړې شوې غونډې کې خبرې کولې وویل، موږ باید د اسلام د پیغمبر له سیرت نه ډېر درسونه زده کړو.
ولسمشر یو بل منل او سوله د پیغمبر (ص) د سیرت یوه برخه وبلله او زیاته یې کړه، د جګړې او تاوتریخوالي زیاتوالی، د زده کړو او پرمختګ پروړاندې خنډونه جوړول او د ښځو او ماشومانو وژل ښيي چې موږ له نبوي سیرت نه لازم درس نهدی اخیستی.
د نوموړي په وینا، حضرت محمد (ص) د خپلو مبارزو پرمهال اړ شو چې وسله واخلي، خو وروستۍ موخه یې جګړه او تاوتریخوالی نه، بلکې په ټولنه کې د سولې او امنیت ټینګښت او د اخلاقي فضیلتونو خپرول وو او همدا سوله او امنیت و چې د مسلمانانو تمدن او فرهنګ پهکې پرمختګ وکړ.
ولسمشر وویل، اوس چې هر څه ډیجیټل کېږي؛ نو دیني عالمان هم باید ورته لاسرسی ولري او ترې ګټه واخیستلی شي.
نوموړي د جوماتونو ملا امامانو ته د کمپیوټر زده کړو پروګرامونو د پیلولو خبر ورکړ او زیاته یې کړه چې د ارشاد، حج او اوقافو وزارت به په ټول هېواد کې دغه پروګرامونه عملي کړي.
د ربېعالاول میاشتې ۱۲مه د اسلام د پیغمبر حضرت محمد (ص) د زوکړې له ورځې سره برابره ده چې هر کال په اسلامي هېوادونو کې دغه ورځ نمانځل کېږي.
