.jpg)
د انګلستان په کوربتوب د سنوکر نړیوالې سیالۍ سکاټلینډي لوبغاړي جون هیګنز ته په ماتې ورکولو سره د انګلستاني لوبغاړي مارک سیلبي په اتلولۍ سره پای ته ورسېدلې.
د سنوکر دغه نړیوالې سیالۍ د انګلستان په یورکشایر کې د ۱۷ ورځو لهپاره وشوې، چی د سنوکر نړۍ لسګونه لوبغاړیو پهکې برخه اخیستې وه؛ خو په لومړي او مهم پړاو کې یوازې ۳۲ غورو لوبغاړيو د لوبېدلو چانس ترلاسه کړی و.
د سیالیو د رسمي وېبپاڼې د معلوماتو له مخې، مارک سیلبي د ۱۹۸۵ کال وروسته د سنوکر سیالیو د تاریخ ښه لوبه وکړه، چی د ۴ پر صفر وروسته والي سره ـ سره یې له خپلې تېرې اتلولۍ دفاع وکړه.
سیلبي خپل سکاټلینډي سیال ته ۱۸ د ۱۵ امتیازونو په مقابل کې ماته ورکړه او په نړیواله درجه بندۍ کې یې لومړی مقام وساتلو.
د اتلولۍ په ګټلو سره مارک سیلبي د اتلولۍ جام تر څنګ د ۳ لکه او ۷۵ زره پونډو نغده جایزه هم ترلاسه کړه او له خپلې کورنۍ سره يې د اتلولۍ خوشالي په لوبغالي کی ونمانځله.
.jpg)
پهدې سره مارک سیلبي له سکاټلینډي لوبغاړي جون هیګنز څخه د ۲۰۰۷ کال سنوکر فاینل لوبې د ماتې غچ هم واخیست.
دا د مارک سیلبي د سنوکر سیالیو د تاریخ درېیمه اتلولي وه او د سنوکر په لوبو کې د سټیف ډیویس، سټیفن هینډري او روني وروسته څلورم لوبغاړی شو، چې د خپلې نړیوالې اتلولۍ څخه دفاع کوي.
د سنوکر نړیوالو سیالیو د اتلولۍ ګټلو وروسته مارک سیلبي رسنیو سره په خبرو کې وویل، د خوشالۍ احساس کوي او اتلولي ګټل یې یو خوب و، چې پوره شو.
.jpg)
دغه راز جون هیګنز هم د اتلولۍ بایللو سره د خپلی لوبې ستاینه وکړه؛ خو دا یې ومنله، چی د یو ستر سنوکر لوبغاړي مارک سیلبي پر وړاندې یې ځکه ماته وخوړه، چی د ده په پرتله ښه ولوبېد او اتلولۍ حقدار و.
دا د انګلستاني لوبغاړي مارک سیلبي په وروستیو ۴ کلونو کې د سنوکر په سترو سیالیو کې درېیمه نړیواله اتلولي وه؛ چې تېر کال یې چینایي ډینګ جن هوی ته په پای لوبه کې ماتې ورکړې وه.
د سنوکر لوبې د نړیوالې اتلولۍ سیالي د لومړي ځل لهپاره په ۱۹۲۷ کال پیل شوه، چې تر اوسه هر کال د انګلستان په کوربتوب کېږي.
