د زعفرانو قیمتي بوټی، چې په نړۍ کې د سرو زرو په نوم یادېږي؛ په ورستیو کلونو کې یې کرکیله د افغانستان په یو شمېر ولایتونو په ځانګړې توګه په هرات کې تر ډېره دود شوې ده.
اوس چې د زعفرانو راټولولو موسم دی، د هرات کرنې ریاست د کروندګرو هڅونې په موخه او نړیوالو ته د دغه قیمتي بوټي ورپېژندلو له پاره د زعفرانو ګل دویمه ملي جشنواره په دغه ولایت کې جوړه کړه.
په دې ملي جشنواره کې د کرنې او مالدارۍ وزارت معین عبدالقدیر جواد وویل، چې په هېواد کې د زعفرانو کرنه د تېرو دوو کلونو په پرتله ۸۰ سلنه زیاتوالی ښيي.
د جواد پر وینا، افغانستان کې اوس پر څه د پاسه ۲ زره هکټاره ځمکه زعفران کرل شوي؛ په داسې حال کې چې دوه کاله مخکې د هېواد په کچه پر ۱۲۰۰هکټاره ځمکه زعفران کرل شوي وو.
د کرنې وزارت معین وویل، دغه وزارت د زعفرانو کرکیلې زیاتېدو په اړه پنځه کلنه ملي کړنلاره چمتو کړې ده.
د کرنې وزارت وايي، د نوې کړنلارې له مخې به په راتلونکو پنځو کلونو کې د زعفرانو کرکیله له ۲ زرو هکټارو ۴ زره هکتاره ته پراخه شي او تولید به یې له ۵ ټنو ۱۶ ټنو ته لوړ شي.
د دې وزارت معین وویل، تېر کال له څلورو تر پنځه نیمو ټنو پورې زعفران ترلاسه شوي، چې له دې اندازې ۲ ټنه یې بهر ته صادر شوي دي.
جواد وايي، چې د افغانستان زعفرانو ۹۰ سلنه په هرات کې تولیديږي.
په ورته وخت کې د هرات والي محمد اصف رحیمي دغه ولایت د زعفرانو پلازمېنه بولي او وایي، ټاکل شوې د کرنې وزارت په هرات کې د زعفرانو کیفیت کنترول لابراتوار جوړ کړي.
په دې جشنواره کې د هرات د کرنې ریاست معاون بشیر احمد احمدي وویل، چې سږ کال د دې ولایت په ۱۵ ولسوالیو کې پر ۲ زره ۵۴۶ هکټاره ځمکه زعفران کرل شوي دي.
دی وايي، تېر کال په دې ولایت کې په ټولټال ۹۶۰ هکټاره ځمکه زعفران کرل شوي وو.
د هرات د کرنې مرستیال رییس بشیر احمد احمدي وویل، د دوی موندنې ښیي، چې سږکال په دغه ولایت کې ۶ ټنه زعفران را ټول شوي دي او اوسمهال په دغه ولایت کې له لس زره ډیرې کورنۍ د زعفرانو پر کرکیله بوختې دي، چې د دوی عاید په کال کې له ۸۰۰ میلیونو افغانیو ډېر اټکل شوی دی.