د کانونو او پټرولیم وزیر نن پنجشنبه (فبروري ۲۵مه) په هرات کې یوې سترې غونډې ته وویل، چې ټاپي پروژه په افغانستان کې د زیر بنايي پروژو لکه د ریل پټلۍ، د نوري فایبر، له ترکمنستان څخه پاکستان ته د برق ليږد او نورو پېل بلل کيږي.
د کانونو او پټرولیم وزیر داود شاه صبا هرات ولایت ته د خپل سفر پر مهال وویل، چې ټاپي پروژه یو له لویو او تاریخي پروژو بلل کيږي، چې د ټولو افغانانو په ځانګړي توګه هغو ته، چې د دغه پایپ لاین په اوږدو کې پراته دي خورا اقتصادي ګټې رسولی شي.
داود شاه صبا وايي، هغه خلک چې د ټاپي پروژې په اوږدو کې پراته دي د دغې پروژې په جوړولو کې به برخه ولري.
نوموړي زیاته کړه، چې د پریکړې پر بنسټ د ټاپي پروژې له ګاز څخه به د برېښنا په تولید کې کار واخیستل شي او دغه برېښنا به د هرات، نیمروز او کندهار ولایتونو د اوسېدونکو د برېښنا اړتیا هم پوره کړي.
" د ګازو پايپ لاین په حقیقت کې د افغانستان په اقتصادي برخه کې د پرمختګ له پاره یو خوځښت دی او د دغو حرکتونو پېل به د هرات ولایت د زیارکښو خلکو له خوا وشي ".
د کانونو او پټرولیم وزیر زیاتوي، چې په نږدې راتلونکي کې به د کارکوونکو د استخدام او د عامو خلکو موټرې به د دغې پروژې د کار له پاره په کار واچول شي.
نوموړي دا هم وویل، چې په پام کې لري د "ټاپي دفتر" په نوم یو دفتر په دې اړه پرانیزي او دغه دفتر به په خورا شفاف ډول خپل کارونه مخ ته بیايي.
په همدې حال کې د هرات ولایت ځينې اوسېدونکي وايي، چې دولت باید سره له اوسه هغه ځمکې استملاک کړي، چې دغه پایپ لاین پرې راځي.
د ادرسکن ولسوال لعل محمد عمرزی او د هرات د زنده جات ولسوالۍ د انکشافي شورا مشر ارباب نظام وايي، چې د خلکو له غوښتنو یو هم دا دی، د پایپ لاین په اوږدو کې، چې د عامو خلکو کومې ځمکې پرتې دي باید د دولت له خوا استملاک شي.
دوی زیاتوي، چې د زنده جان د خلکو غوښتنه دا ده، چې څه په واک لري باید د دغه پايپ لاین په پروژه کې په کار واچول شي او نور دوی له دولت سره هر راز مرستې ته چمتو دي.
د کانونو او پټرولیم وزارت د مسوولينو په وینا، اوسمهال په ترکمنستان کې د ګازو د تصفيې پر فابریکو کار پېل شوی او له هغه وروسته به په ۲۰۱۷ م ز کال کې د پایپ لاین کېښودلو کار به پېل شي او په ۲۰۲۰م ز کال کې به په دغه پایپ لاین کې د ګازو د لېږد پروسه رسماً پېل شي.
د ټاپي پروژه د افغانستان یو له لویو ټرانزيټي پروژو بلل کيږي، چې په پام کې ده د ترکمنستان ګاز د افغانستان له لارې پاکستان او هند ته ولېږدول شي.
ددغې پروژې له لارې به ګاز د هرات، فراه، هلمند، کندهار او نیمروز ولایتونو له لارې د پاکستان کويټې ته ولېږدول شي.
